لاہور: وزیراعلیٰ پنجاب مریم نوازشریف کی یوم دفاع کے موقع پر کینٹ میں یادگار شہداء پر حاضری دی اور پھول چڑھائے- وزیراعلی مریم نوازشریف نے شہداء کے درجات کی بلندی کے لئے دعا بھی کی-وزیراعلیٰ مریم نوازشریف نے یوم دفاع کے موقع پر یاد گار شہداء پر حاضری کے بعد خصوصی طورپر گفتگو کرتے ہوئے کہاکہ میرے لئے بہت اعزاز اور فخر کی بات ہے –
یوم دفاع پر آج مجھے شہداء کی یاد گار پر آنے اور خراج عقیدت پیش کرنے کا موقع ملا-شہداء کی فیملیز سے ملاقات کرنے کا موقع ملا اور اس باوقار تقریب میں شامل ہونے کا موقع ملا-قوم کو پیغام دینا چاہتی ہوں کہ بیرونی دفاع میں افواج پاکستان ایک بہت اچھا کام کررہی ہیں-
افواج پاکستان جاگتی ہیں تو ہم سکون سے سوتے ہیں، ہمارے بارڈرز، فرنٹیرز اور سرحدوں کی حفاظت کرتے ہیں-ملک کا اندرونی دفاع ہم سب کی اجتماعی ذمہ داری ہے-شہداء ہمارے لئے جانوںکا نذرانہ پیش کرتے ہیں، ان کی عزت کی حفاظت ، ان کی قربانی کا احترام ہم سب کی اجتماعی ذمہ داری ہے-
آج میں شہداء کی مائوں کو خصوصا خراج تحسین پیش کرنا چاہتی ہوں، ان سے میری ملاقات بھی ہوئی ہے -یہ ایک ایسا جذبہ ہے کہ ہم اسے سوچنا چاہئیں تو اس جذبے کی عظمت کا احاطہ نہیں کرسکتے-ایک ماں اس بات کو سمجھ سکتی ہے کہ اس کا بچہ گھر سے باہر جاتا ہے، ماں انتظار میں ہوتی ہے اسکی خیریت کے لئے دعا کرتی ہے، جب بچہ آتا ہے تو ماں سکون کی نیند سوتی ہے-
میںسمجھتی ہوں کہ یہ جذبہ بھی ایک ناقابل تسخیرجذبہ ہے جب ماں اپنے بچے کو میدان جنگ میں ملک کی حفاظت کے لئے بھیجتی ہے- ماں جانتی کہ وہ اسے کہاںبھیج رہی ہے اور اس کے ساتھ کیا ہوسکتاہے، اس کو یہ پتہ ہوتاہے کہ ایک دن اس کا جسد خاکی بھی واپس آسکتاہے-
شہداء اوران کی فیملیز کی قربانیوں کے سامنے میں کیا بات کروں ، ہمیں اپنا آپ بہت چھوٹا لگتاہے-شہداء کی قربانیاں کسی بھی قوم کی ریڈ لائن ہوتی ہے، اسے کراس کرنا ،اسے توڑنا ،کسی بھی محب وطن انسان کو زیب نہیں دیتا-
وزیراعلی مریم نوازشریف نے اپنی گفتگو کے اختتام پر دعا کرتے ہوئے کہاکہ اللہ تعالی پاکستان کو سلامت رکھے اور پاکستان زندہ باد کا نعرہ لگایا-پاک فوج کے چاق و چوبند دستے نے یادگار شہداء پرسلامی پیش کی –
وزیراعلی مریم نوازشریف نے شہدا ء کی عظیم قربانیوں کو خراج عقیدت پیش کیا -وزیراعلی مریم نوازشریف نے شہداء کی فیملیز سے ملاقات کی ، شہداء کے بچوں سے اظہار شفقت کیا-
شہداء کی قربانیاں کسی بھی قوم کی ریڈ لائن: مریم نواز
