عالمی ایوارڈ قوالی پر بنی پاکستانی دستاویزی فلم کے نام

اسلام آباد: 15ویں شکاگو ساؤتھ ایشین فلم فیسٹیول میں پاکستانی میوزک ڈاکومینٹری فلم سانگز آف دی صوفی نے بہترین ڈاکومینٹری آڈینس چوائس ایوارڈ جیت لیا۔اس ڈاکومینٹری میں قوال بچے گھرانے کے قوالیوں، شائقین، عقیدت مندوں اور میوزک اسکالرز کے ذریعے کلاسیکل قوالی کی کہانی بیان کی گئی ہے۔
معروف پاکستانی فنکاروں کے صوفیانہ سوچ سے متاثر آرٹ، مغل منی ایچر پینٹنگز، قوالیوں، انٹرویوز اور سچی کہانی سنانے کے انداز کو یکجا کرتے ہوئے یہ ڈاکومینٹری فلمائی گئی ہے۔صوفیانہ گیت ایک حیرت انگیز فن ہے جو تاریخ، ثقافت اور محبت کے آفاقی پیغام کی کھوج کرتا ہے۔
شکاگو ساتھ ایشین فلم فیسٹیول کے ڈائریکٹر جگر شاہ نے کہا کہ میں بہت خوش ہوں کہ اس ڈاکومینٹری نے ہمارے فیسٹیول میں کامیابی حاصل کی۔انہوں نے کہا کہ شاہ رخ وحید اور کامران انور نے اس شاہکار کو بڑے پردے پر نہایت عمدہ انداز میں پیش کیا ہے۔
ڈاکو مینٹری کے ہدایت کار شاہ رخ وحید نے کہا کہ ہمیں بہت اچھا لگ رہا ہے کہ ہماری ڈاکومینٹری کو دنیا بھر کے ناظرین کی جانب سے سراہا جارہا ہے۔انہوں نے کہا کہ یہ قوالی کے فن اور قوال خاندانوں کی جانب سے اس مقدس فن کو زندہ رکھنے کے لئے ہمارا خراج تحسین ہے اور ہم اسے دنیا کے ساتھ بانٹنا چاہتے ہیں۔