اسلام آباد / شمالی وزیرستان : ایک نجی کمپنی کا ہیلی کاپٹر شمالی وزیرستان قبائلی ضلع گر کر تباہ ہوگیا ہے جس میں چھ افراد ہلاک ہوئے ہیں۔ سرکاری ذرائع کے مطابق ہیلی کاپٹر شمالی وزیرستان کے شیوہ کے علاقے میں تکنیکی خرابی کی وجہ سے گرکر تباہ ہوا ہے جس کے نتیجے میں آٹھ دیگر افراد زخمی ہوگئے ہیں۔
ذرائع کے مطابق ماڑی پٹرولیم کمپنی کا چارٹرہیلی کاپٹر آئل فیلڈ کے قریب گر کر تباہ ہوگیا ۔ ہیلی کاپٹر میں تین غیر ملکی پائلٹ سمیت چودہ مسافر سوار تھے ۔سرکاری ذرائع کے مطابق حادثہ تکنیکی مسائل کی وجہ سے پیش آیا اور دہشتگردی کا کوئی امکان نہیں ہے ۔
ابتدائی تحقیقات کے مطابق ہیلی کاپٹر کے انجن میں خرابی پیدا ہوگئی تھی اور پائلٹ نے اتارنے کی کوشش کی لیکن اترنے کے وقت ہیلی کاپٹر زمین سے ٹکراگیا ۔ہیلی کاپٹر ایم آئی آٹھ ساختہ پرانا ماڈل ہے اس کو اکثر روسی یا یوکرینی پائلٹ اڑاتے ہیں یہ ہیلی کاپٹر ایک غیر ملکی کمپنی کی ملکیت تھا ۔
دریں اثناء ماڑی پیٹرولیم کی جانب سے جاری کیے گئے اعلامیے کے مطابق ہیلی کاپٹر پر 3 غیر ملکی پائلٹس سمیت 14 مسافر سوار تھے، تینوں پائلٹس کا تعلق روس سے ہے۔ترجمان ماڑی پیٹرولیم کے مطابق زخمی ہونے والے افراد کو قریبی ہسپتال منتقل کر دیا گیا ہے۔
نجی کمپنی کا ہیلی کاپٹر شمالی وزیرستان میں گر کر تباہ، 6افراد ہلاک
