محکمہ موسمیات نے بارش ،ژالہ باری اورآندھی کی پیش گوئی کر دی

لاہور:محکمہ موسمیات نے 16 سے 18 اپریل تک اسلام آباد سمیت ملک کے کئی شہروں میں بارش اور ژالہ باری کی پیشگوئی کی ہے۔ جنوبی علاقوں میں گرمی کی لہر جاری رہے گی، جبکہ بالائی علاقوں میں آندھی اور بارش متوقع ہے۔ شہریوں کو احتیاط کی ہدایت کی گئی ہے۔
تفصیلات کے مطابق محکمہ موسمیات کے مطابق، 16 سے 18 اپریل کے دوران وفاقی دارالحکومت اسلام آباد اور ملک کے دیگر شہروں میں بارش ہو سکتی ہے۔
بیان میں بتایا گیا کہ ملک کے جنوبی علاقوں میں 18 اپریل تک گرمی کی لہر برقرار رہنے کا امکان ہے۔ اس کے برعکس، بالائی علاقوں میں آندھی اور جھکڑ کے ساتھ وقفے وقفے سے بارش ہو سکتی ہے۔
محکمہ موسمیات نے کہا کہ 16 سے 20 اپریل کے دوران دیر، سوات، شانگلہ، بونیر، مردان اور پشاور میں بارش کے ساتھ ژالہ باری بھی ہو سکتی ہے۔ اسی طرح، مری، ڈیرہ اسماعیل خان، ٹانک، بنو، گلیات اور وزیرستان میں بھی بارش اور ژالہ باری کا امکان ہے۔
پیشگوئی کے مطابق، 16 سے 18 اپریل تک اور 20 اپریل کی شام کو اسلام آباد، تلہ گنگ، جہلم اور چکوال میں بارش متوقع ہے۔ اس کے علاوہ، جھنگ، ٹوبہ ٹیک سنگھ، گجرات اور گجرانوالہ میں بھی بارش اور ژالہ باری ہو سکتی ہے۔
محکمہ موسمیات نے بتایا کہ 18 اور 19 اپریل کو جنوبی پنجاب میں آندھی اور تیز ہواؤں کا امکان ہے۔
شہریوں کے لیے جاری کردہ ہدایت میں کہا گیا کہ بارش اور آندھی کے دوران کھمبوں اور درختوں کے قریب کھڑے ہونے سے بچیں۔
محکمہ موسمیات نے خبردار کیا کہ مری، کشمیر، گلگت بلتستان اور گلیات میں لینڈ سلائیڈنگ کا خطرہ ہے۔