پاکستانی آرمی چیف نے دوٹوک الفاظ میں بھارت کو پیغام دیا کہ 13 لاکھ کی بھارتی فوج اپنے تمام ہتھیاروں سمیت بھی ہمیں خوفزدہ نہیں کر سکتی۔ آپریشن "بُنْيَانٌ مَّرْصُوْص” کے ذریعے افواجِ پاکستان نے بھارتی جارحیت کا منہ توڑ جواب دے کر یہ ثابت کر دیا کہ پاکستانی قوم اور فوج ہر حملے کے آگے ایک مضبوط دیوار بن کر کھڑی ہے۔
اسلام آباد سے موصول ہونے والی تفصیلات کے مطابق آرمی چیف نے اپنے حالیہ بیان میں واضح طور پر کہا کہ بھارت کی 13 لاکھ فوج چاہے جتنے بھی ہتھیار استعمال کر لے، وہ ہمیں ڈرا یا دھمکا نہیں سکتی۔ انہوں نے کہا کہ تاریخ اس بات کی گواہ ہے کہ افواجِ پاکستان اور عوام نے ہمیشہ دشمن کے ہر حملے کے خلاف سیسہ پلائی ہوئی دیوار کا کردار ادا کیا ہے۔
آرمی چیف نے کہا کہ آپریشن "بُنْيَانٌ مَّرْصُوْص” کے ذریعے پاکستان نے بھارت کو زبردست جواب دیا اور افواجِ پاکستان نے جو کہا تھا، وہ کر کے دکھایا۔ انہوں نے مزید کہا کہ پاکستان نے کئی بار بھارت کو خبردار کیا تھا کہ ہماری امن کی خواہش کو کمزوری نہ سمجھا جائے۔
آرمی چیف اور ڈی جی آئی ایس پی آر نے پہلے ہی واضح طور پر کہہ دیا تھا کہ اگر بھارت نے کوئی جارحیت کی تو اس کا بھرپور جواب دیا جائے گا۔ اور آپریشن "بُنْيَانٌ مَّرْصُوْص” دراصل اسی وعدے کی تکمیل ہے، جس پر اللہ کے فضل و کرم سے افواج پاکستان نے پورا اتر کر دکھایا۔
جنرل عاصم منیر نے قرآن کریم کی آیات کا حوالہ دیتے ہوئے کہا کہ اللہ کی مدد سے بارہا ایسا ہوا ہے کہ ایک چھوٹی طاقت نے بڑی طاقت کو شکست دی، اور الحمدللہ تاریخ نے یہ بار بار ثابت کیا ہے کہ پاکستانی فوج اور قوم نے دشمن کے ہر وار کے آگے مضبوطی سے ڈٹ کر دکھایا ہے۔
انہوں نے کہا کہ پاکستان میں اپنی علاقائی سالمیت اور خودمختاری کے تحفظ کے لیے مکمل دفاعی صلاحیت موجود ہے اور ہمیں بخوبی معلوم ہے کہ ملک کا دفاع کیسے کرنا ہے۔ 13 لاکھ بھارتی فوج اپنے تمام تر ہتھیاروں کے ساتھ بھی ہمیں خوفزدہ نہیں کر سکتی۔
آرمی چیف جنرل عاصم منیر نے یہ بھی کہا کہ ہمارے بزرگوں اور ہمارے جوانوں نے اس ملک کی خاطر عظیم قربانیاں دی ہیں اور ہم اپنے ملک کی حفاظت کرنا بخوبی جانتے ہیں۔
ڈی جی آئی ایس پی آر نے بھی اس حوالے سے کہا تھا کہ پاکستانی قوم نہ تو بھارت کی طاقت سے ڈرتی ہے، نہ ہی اس کی چالاکیوں یا جارحیت سے مرعوب ہوتی ہے۔ اب بھارت ہمارے جواب کا انتظار کرے۔
دفاعی ماہرین کے مطابق پوری دنیا نے دیکھا کہ افواجِ پاکستان نے بھارتی جارحیت کے خلاف جس انداز سے بھرپور ردعمل دیا، اس سے بھارت کو گھٹنے ٹیکنے پر مجبور کر دیا گیا۔ افواجِ پاکستان نے اپنی شہادت کے جذبے اور عمل سے یہ بات واضح کر دی ہے کہ دنیا کی کوئی طاقت پاکستان کو نقصان پہنچانے کا تصور بھی نہیں کر سکتی۔
