فلمی دنیا میں کئی فنکار ایسے ہیں جن کے والدین مختلف پیشوں سے تعلق رکھتے ہیں، لیکن ان کے بچوں نے اپنی محنت سے انڈسٹری میں نمایاں مقام حاصل کیا۔ ایسے ہی فنکاروں میں پریانکا چوپڑا شامل ہیں، جنہوں نے بالی وڈ سے ہالی وڈ تک اپنی صلاحیتوں کا لوہا منوایا اور اپنے والدین کا سر فخر سے بلند کیا۔
ابتدائی زندگی:
18 جولائی 1982 کو جمشید پور، بہار (موجودہ جھارکھنڈ) میں پیدا ہونے والی پریانکا چوپڑا کا تعلق ایک بھارتی فوجی معالجین کے خاندان سے ہے۔ ان کے والد، اشوک چوپڑا، پنجابی ہندو تھے، جبکہ ان کی والدہ، مدھو چوپڑا، جھارکھنڈ سے تعلق رکھنے والی بہاری-مگاہی ہندو تھیں۔ والدین کے فوج میں خدمات انجام دینے کی وجہ سے پریانکا کا خاندان بھارت کے مختلف شہروں، جیسے دہلی، چندی گڑھ، امبالہ، لداخ، لکھنؤ، بریلی، اور پونے میں رہائش پذیر رہا۔
تعلیمی پس منظر:
پریانکا نے لکھنؤ کے لا مارٹینیر گرلز اسکول اور بریلی کے سینٹ ماریا گوریٹی کالج سے ابتدائی تعلیم حاصل کی۔ 13 سال کی عمر میں وہ امریکہ منتقل ہوئیں، جہاں اپنی خالہ کے ساتھ رہتے ہوئے انہوں نے معروف اسکولوں سے تعلیم حاصل کی۔ وہ تھیٹر پروڈکشنز کا حصہ بنیں اور ویسٹرن کلاسیکل موسیقی کی تربیت بھی حاصل کی۔
پریانکا کہتی ہیں کہ اسکول بدلنے اور مختلف شہروں میں رہنے کا تجربہ ان کے لیے زندگی کے نئے پہلوؤں کو سمجھنے کا موقع تھا۔ لداخ میں گزارے وقت کو وہ اپنی زندگی کی حسین یادوں میں شمار کرتی ہیں۔
مقامی مقابلہ حسن اور شہرت:
ہائی اسکول کی تعلیم کے دوران بریلی میں مقامی بیوٹی پیجینٹ جیتنے کے بعد پریانکا کی شہرت بڑھنے لگی۔ اس کے نتیجے میں ان کے والدین نے ان کی حفاظت کے لیے گھر میں سلاخیں لگوائیں۔ جلد ہی ان کی والدہ نے انہیں 2000 کے فیمینا مس انڈیا مقابلے میں شرکت کرنے کے لیے آمادہ کیا، جہاں وہ دوسرے نمبر پر آئیں اور ’فیمینا مس انڈیا ورلڈ‘ کا خطاب اپنے نام کیا۔
عالمی سطح پر کامیابی:
اسی سال پریانکا نے ’مس ورلڈ‘ کا اعزاز جیتا اور یہ مقابلہ جیتنے والی پانچویں بھارتی خاتون بن گئیں۔ اس کامیابی نے انہیں عالمی سطح پر شہرت دلائی اور فلم انڈسٹری میں انٹری کا دروازہ کھول دیا۔
فلمی سفر:
’مس ورلڈ‘ کا تاج جیتنے کے بعد، پریانکا نے تامل فلم تھامیزھان سے اپنے فلمی سفر کا آغاز کیا۔ 2003 میں بالی وڈ ڈیبیو فلم دی ہیرو: لو اسٹوری آف آ سپائی کے بعد، انہوں نے انداز میں اکشے کمار اور لارا دتا کے ساتھ اداکاری کی، جو ان کے کیریئر کا پہلا بڑا بریک تھرو تھا۔
کامیابی کے سنگ میل:
پریانکا چوپڑا آج بھارت کی سب سے زیادہ معاوضہ لینے والی اداکاراؤں میں شامل ہیں۔ انہیں دو نیشنل فلم ایوارڈز، پانچ فلم فیئر ایوارڈز، اور 2016 میں بھارت کے چوتھے سب سے بڑے شہری اعزاز ’پدم شری‘ سے نوازا گیا۔ ٹائم میگزین نے انہیں دنیا کی 100 بااثر ترین شخصیات میں شامل کیا، جبکہ فوربز نے انہیں دنیا کی طاقتور خواتین میں شمار کیا۔
ازدواجی زندگی:
پریانکا چوپڑا نے 2018 میں امریکی گلوکار نک جونس سے شادی کی۔ ان کی بیٹی، مالتی میری، 2022 میں سروگیسی کے ذریعے پیدا ہوئی۔
سماجی کام:
پریانکا چوپڑا خواتین کے حقوق اور ماحولیاتی مسائل کے حوالے سے فعال ہیں۔ وہ 2010 سے یونیسف کی گڈول ایمبیسیڈر ہیں اور عالمی سطح پر بچوں کے حقوق کے لیے کام کر رہی ہیں۔
