ممبئی: (خصوصی رپورٹ: غلام مرتضیٰ)بالی ووڈ کے معروف اداکار Aamir Khan نے اپنی ذاتی زندگی کے مشکل ترین دور سے پردہ اٹھاتے ہوئے پہلی اہلیہ Reena Dutta سے طلاق کے بعد کے حالات بیان کر دیے۔
اداکار کے مطابق طلاق کا وقت ان کی زندگی کا انتہائی کٹھن مرحلہ تھا اور اس دن کی رات ان کے لیے بہت زیادہ مشکل ثابت ہوئی۔ انہوں نے بتایا کہ وہ اس سے پہلے کبھی شراب نوشی نہیں کرتے تھے، تاہم حالات نے انہیں اس طرف مائل کر دیا۔
عامر خان نے کہا کہ جب ان کی اہلیہ بچوں کے ساتھ گھر چھوڑ کر چلی گئیں تو وہ بالکل اکیلے رہ گئے، اسی دوران گھر میں موجود مشروبات کو آزمانے کا فیصلہ کیا جو بعد میں عادت بن گئی۔
ان کے مطابق وہ تقریباً ڈیڑھ سال تک روزانہ رات کو ایک بوتل تک پی جاتے تھے، جو ان جیسے شخص کے لیے غیر معمولی بات تھی جو پہلے اس سے مکمل پرہیز کرتا تھا۔
اداکار کا کہنا تھا کہ شادی کا خاتمہ دونوں خاندانوں کے لیے مشکل تھا، تاہم انہوں نے اس صورتحال کو سمجھداری سے سنبھالنے کی کوشش کی اور وقت کے ساتھ اپنی ذاتی اور پیشہ ورانہ زندگی میں آگے بڑھ گئے۔
انہوں نے اس دور کو اپنی زندگی کا ایک کمزور مرحلہ قرار دیتے ہوئے اعتراف کیا کہ یہ وقت جذباتی طور پر بہت زیادہ چیلنجنگ تھا۔
واضح رہے کہ عامر خان نے 1986 میں 21 سال کی عمر میں رینا دتہ سے شادی کی تھی، دونوں کے دو بچے ایرا اور جنید ہیں جبکہ 2002 میں ان کے درمیان علیحدگی ہو گئی۔
بعد ازاں عامر خان نے 2005 میں فلم ساز Kiran Rao سے شادی کی، تاہم 2021 میں دونوں نے علیحدگی اختیار کر لی، جبکہ وہ اپنے بیٹے آزاد کی مشترکہ پرورش جاری رکھے ہوئے ہیں۔
رواں برس انہوں نے اپنی ساتھی Gauri Spratt کو بھی عوام کے سامنے متعارف کروایا، جس کے بعد وہ مختلف تقریبات میں ایک ساتھ نظر آئے۔
