جنوبی بھارت کی معروف اداکارہ رشمیکا مندنا اب سب سے مہنگی اور مقبول اداکاراؤں میں شامل ہو گئی ہیں۔ فوربز انڈیا کی رپورٹ کے مطابق، وہ ایک فلم کے لیے 10 کروڑ روپے تک معاوضہ وصول کر رہی ہیں۔ پشپا اور اینیمل جیسی بلاک بسٹر فلموں کے بعد، وہ نہ صرف ٹالی ووڈ بلکہ بالی ووڈ میں بھی کامیابی کے جھنڈے گاڑ رہی ہیں۔
بھارتی فلم انڈسٹری کی مقبول اداکارہ رشمیکا مندنا اب ملک کی مہنگی ترین اداکاراؤں میں شامل ہو چکی ہیں۔ فوربز انڈیا کی تازہ رپورٹ کے مطابق، وہ ایک فلم کے لیے 10 کروڑ روپے تک معاوضہ وصول کر رہی ہیں، جو انہیں ٹالی ووڈ اور بالی ووڈ میں سب سے زیادہ معاوضہ لینے والی اداکاراؤں میں شامل کرتا ہے۔
رشمیکا مندنا، جو جنوبی بھارتی فلموں میں اپنی شاندار اداکاری کے لیے مشہور ہیں، اب بالی ووڈ میں بھی جگہ بنانے میں کامیاب ہو چکی ہیں۔ وہ عید کے موقع پر سلمان خان کے ساتھ فلم سکندر میں جلوہ گر ہوں گی، جس سے ان کی شہرت مزید بڑھنے کی توقع ہے۔
پشپا اور اینیمل جیسی بلاک بسٹر فلموں کے بعد، وہ ہندوستانی سنیما میں ایک اہم مقام حاصل کر چکی ہیں۔ اب تقریباً ہر بڑی فلم میں انہیں اولین انتخاب کے طور پر دیکھا جا رہا ہے، چاہے وہ تمل انڈسٹری ہو یا بالی ووڈ۔
فوربز انڈیا کے مطابق، رشمیکا کے پاس حیدرآباد، بنگلورو، ممبئی اور کورگ میں موجود جائیدادوں سمیت 70 کروڑ روپے کے اثاثے ہیں۔ ان کی شہرت اور معاوضے میں تیزی سے اضافہ ہو رہا ہے، جس کی بدولت وہ آنے والے وقت میں بالی ووڈ کی نامور اداکاراؤں کے لیے سخت مقابلہ بن سکتی ہیں۔
