آفریدی کے بیان نے بھارتی کھلاڑیوں کو مشتعل کر دیا

پہلگام میں ہونے والے دہشت گرد حملے پر قومی کرکٹ ٹیم کے سابق کپتان شاہد آفریدی کے بیان نے بھارتی کرکٹرز اور ان کے حامیوں میں غم و غصہ پیدا کر دیا۔ اس بیان نے سابق پاکستانی کرکٹر دانش کنیریا کے بعد بھارتی اوپنر شیکھر دھون کو بھی آفریدی کے خلاف بولنے پر مجبور کر دیا۔

میڈیا رپورٹس کے مطابق شاہد آفریدی نے پہلگام حملے پر بھارتی فوج کی ناکامی پر سوال اٹھاتے ہوئے کہا تھا کہ اگر وہاں پٹاخہ بھی پھٹ جائے تو بھارت پاکستان پر الزام لگا دیتا ہے۔ انہوں نے کہا کہ مقبوضہ کشمیر میں 8 لاکھ بھارتی فوج موجود ہونے کے باوجود یہ واقعہ ہو گیا، جس کا مطلب ہے کہ وہ لوگوں کو سیکیورٹی دینے میں ناکام رہے اور نالائق ہیں۔

سابق کرکٹر نے مزید کہا کہ 2016 کے ٹی20 ورلڈ کپ کے دوران حالات خراب ہونے کے باوجود پاکستانی ٹیم بھارت گئی تھی۔ انہوں نے کہا کہ ہمیں خود نہیں پتا تھا کہ جانا ہے یا نہیں۔ انہوں نے طنز کیا کہ بھارت کی کبڈی ٹیم پاکستان آ جاتی ہے، لیکن کرکٹ ٹیم نہیں آتی۔ انہوں نے کہا کہ اگر رابطے بند کرنے ہیں تو پھر سب کچھ بند کر دیں۔

اس بیان کے جواب میں دانش کنیریا نے بھارت کی حمایت کرتے ہوئے اور پاکستان کے خلاف بات کرتے ہوئے شاہد آفریدی کو سخت تنقید کا نشانہ بنایا۔ اب سابق بھارتی کرکٹر شیکھر دھون نے بھی پہلگام حملے پر آفریدی کے بیان کو تنقید کا نشانہ بنایا۔ دھون نے کہا کہ ہم نے تمہیں کارگل میں بھی ہرایا تھا، تم پہلے ہی اتنا گر چکے ہو، اب اور کتنا گرو گے؟ ہمیں اپنی فوج پر بہت فخر ہے۔

دھون نے مزید کہا کہ پہلگام واقعے پر شاہد آفریدی کا بیان انتہائی نامناسب تھا۔ انہیں اپنے ملک کی ترقی پر توجہ دینی چاہیے۔

شاہد آفریدی کے اس بیان سے سابق بھارتی کرکٹرز اور ان کے حامی بہت ناراض ہیں اور وہ انہیں تنقید کا نشانہ بنا رہے ہیں۔ اس دوران بھارتی حکومت نے تنقید سے بچنے کے لیے پاکستانی ٹی وی چینلز پر پابندی لگانے کا فیصلہ کیا ہے