خون کا ٹیسٹ کئی اقسام کے کینسر کی بروقت تشخیص میں مددگار ثابت ہوسکتا ہے؛تحقیق

ایک تازہ تحقیق سے پتا چلا ہے کہ خون کا ٹیسٹ اب نصف سے زیادہ کینسرز کو اس وقت پکڑ سکتا ہے جب وہ علاج کے قابل ہوتے ہیں۔

محققین نے بی ایم جے اوپن نامی جریدے میں بتایا کہ اگر کینسر کی ابتدائی شناخت کے لیے خون کے ٹیسٹ ہر سال یا ہر دوسرے سال کیے جائیں تو اس سے بہت سے لوگوں کو کینسر سے بچانے میں مدد مل سکتی ہے۔

لندن کی کوئین میری یونیورسٹی کے پروفیسر پیٹر ساسیینی کی قیادت میں ایک تحقیقی ٹیم نے نتیجہ نکالا کہ سالانہ یا دو سالہ ملٹی کینسر ایئرلی ڈیٹیکشن (MCED) ٹیسٹ کینسر سے ہونے والی اموات کو روک سکتے ہیں۔

محققین نے بتایا کہ یہ خون کا ٹیسٹ کینسر سے جڑے کئی اشاروں کو ڈھونڈتا ہے، جیسے کہ ٹیومر سے خراب ہونے والے ڈی این اے کے چھوٹے ٹکڑے۔

انہوں نے یہ بھی کہا کہ فی الحال صرف چند اسکریننگ ٹیسٹ ہی کینسر کا پتا لگا سکتے ہیں، اور وہ بھی زیادہ خطرے والے لوگوں میں۔ ان میں چھاتی، بڑی آنت، سروائیکل، اور پھیپھڑوں کے کینسر شامل ہیں۔