دفتر خارجہ نے بھارتی وزیراعظم مودی کے حالیہ بیانات کو سختی سے مسترد کرتے ہوئے انہیں اشتعال انگیز اور جھوٹا قرار دیا ہے۔ پاکستان نے خبردار کیا ہے کہ ایسے بیانات نہ صرف خطے کے امن کے لیے خطرہ ہیں بلکہ بھارت کی جانب سے اپنے داخلی مسائل سے توجہ ہٹانے کی ایک چال بھی ہو سکتے ہیں۔
اسلام آباد: دفتر خارجہ نے بھارتی وزیراعظم نریندر مودی کے الزامات کو جھوٹ پر مبنی اور اشتعال انگیز قرار دیتے ہوئے شدید ردعمل ظاہر کیا ہے۔ ترجمان دفتر خارجہ کا کہنا ہے کہ ایسے بیانات کا مقصد صرف سیاسی فائدہ حاصل کرنا اور خطے میں تناؤ کو بڑھانا ہے۔
ترجمان نے واضح کیا کہ یہ بیانات عوام کو گمراہ کرنے کی شعوری کوشش ہیں اور یہ ایک ذمہ دار ریاست کے طرز عمل کے برخلاف ہیں۔ انہوں نے کہا کہ پاکستان نے دہشت گردی کے خلاف عالمی جنگ میں ہمیشہ بھرپور کردار ادا کیا ہے اور اس پر لگائے گئے الزامات حقائق کے برعکس ہیں۔
انہوں نے یہ بھی کہا کہ بھارت جان بوجھ کر پاکستان پر الزام تراشی کرکے اپنے اندرونی مسائل سے توجہ ہٹانا چاہتا ہے۔ ایک خودمختار ملک کے خلاف فوجی کارروائی پر فخر کرنا عالمی قوانین کی کھلی خلاف ورزی ہے، اور یہ رویہ خطے کے امن و استحکام کے لیے نقصان دہ ہے۔
ترجمان نے بھارتی قیادت پر زور دیا کہ وہ ذمہ داری اور صبر و تحمل کا مظاہرہ کرے۔ انہوں نے کہا کہ جارحانہ بیانات صرف خطے میں کشیدگی کو بڑھاتے ہیں۔ پاکستان خطے میں امن و استحکام کے لیے پرعزم ہے، لیکن اس کی امن پسندی کو ہرگز کمزوری نہ سمجھا جائے۔
دفتر خارجہ نے واضح کیا کہ پاکستان کی مسلح افواج مکمل طور پر چوکنا اور ملک کے دفاع کے لیے تیار ہیں۔ ماضی میں بھی پاکستان نے ہر جارحیت کا بھرپور جواب دیا اور آئندہ بھی ضرورت پڑنے پر موثر ردعمل دیا جائے گا۔
ترجمان نے عالمی برادری سے مطالبہ کیا کہ بھارت کے نفرت انگیز بیانیے کا نوٹس لے، کیونکہ یہ خطے کے امن کو خطرے میں ڈال رہا ہے۔
