دنیا کے بہترین اور بدترین شہروں کی فہرست جاری، لاہور، اسلام آباد، کراچی کا کون سا نمبر؟
بیرون ملک ملازمت کے لیے شہر کا انتخاب ایک مشکل کام ہوتا ہے۔ اس سلسلے میں مرکر نامی ادارے نے 2024 کے لیے دنیا کے بہترین اور بدترین شہروں کی فہرست جاری کی ہے۔
مرکر ادارے نے دنیا کے 450 سے زیادہ شہروں کا تجزیہ کیا اور سیاسی، سماجی، صحت، تعلیم، جرائم کی شرح اور دیگر 39 عوامل کی بنیاد پر ان کی درجہ بندی کی۔
اس فہرست میں سوئٹزرلینڈ کا شہر زیورخ سب سے اوپر رہا اور اسے رہنے کے لیے سب سے بہترین شہر کا درجہ ملا۔ دوسرے نمبر پر آستریا کا شہر ویانا، تیسرے نمبر پر سوئٹزرلینڈ کا جنیوا، چوتھے نمبر پر ڈنمارک کا کوپن ہیگن، پانچویں نمبر پر نیوزی لینڈ کا آکلینڈ، اور چھٹے نمبر پر نیدر لینڈ کا ایمسٹرڈیم ہے۔
اسی طرح، ساتویں نمبر پر جرمنی کا فرینکفرٹ، آٹھویں نمبر پر کینیڈا کا وینکوور، اور سوئٹزرلینڈ کے شہروں برن اور باسل نواں اور دسویں نمبر پر ہیں۔
ایشیا کے بہترین شہر کے طور پر سنگاپور کو منتخب کیا گیا جو مجموعی طور پر 30 ویں نمبر پر ہے۔ پاکستان کے دارالحکومت اسلام آباد کا 204، کراچی کا 218 اور لاہور کا 220 نمبر ہے۔
دوسری جانب، سوڈان کا دارالحکومت خرطوم دنیا کا بدترین شہر قرار پایا، جو 241 نمبر پر ہے۔ اس کے بعد جنگ زدہ عراق کا بغداد 240، وسطی افریقی جمہوریہ کا بنگوئی 239، یمن کا صنعا 238 اور ہیٹی کا پورٹ او پرنس 237 نمبر پر ہیں۔
