الحاد اور فکری انتشار سے بچنے کیلئے انفرادیت کی بجائے اجتماعیت اختیار کریں :ڈاکٹر حسن محی الدین قادری
لاہور:منہاج القرآن انٹرنیشنل سپریم کونسل کے چیئرمین ڈاکٹر حسن محی الدین قادری نے مرکزی سیکرٹریٹ میں فکری تربیتی نشست سے خطاب کرتے ہوئے کہا کہ اسلام نے انسانیت کو اجتماعیت کا ضابطہ حیات عطا کیا۔ فتنہ الحاد، تکفیری خیالات اور فکری انتشار سے بچنے کے لئے انفرادیت کی بجائے اجتماعیت اختیار کریں اورہر نوع کی فرقہ واریت کو مسترد کر دیا جائے۔
انہوں نے کہا کہ گھروں اور پیشہ وارانہ زندگی میں دوسروں کی خدمات کا اعتراف کرنا سیکھیں۔ ”میں“ کی جگہ ”ہم“ کا لفظ استعمال کریں،جماعت پر اللہ کا ہاتھ ہوتا ہے، مشاورت اور ٹیم ورک سے بڑے بڑے مشکل اہداف بآسانی حاصل ہو جاتے ہیں۔ اس مشاورتی رویے سے باہمی اعتماد میں اضافہ اور کارکردگی بہتر ہوتی ہے، شیطان کو اپنی عبادات پر بڑا زعم تھا اور اسی تکبر اور ”میں“ نے اُسے قیامت تک کے لئے راندہ درگاہ بنادیا۔ انہوں نے اجتماعیت کی افادیت پر گفتگو کرتے ہوئے کہا کہ عبادات میں بھی اللہ اور اس کے رسولؐ کو اجتماعیت پسند ہے، باجماعت نماز کی ادائیگی کا ثواب انفرادی طور پر ادا کی جانے والی نماز سے کئی گناہ زیادہ ہے، فریضہ حج کی ادائیگی میں اجتماعیت اعمال کو پرنور بنا دیتی ہے، قرآن کا حکم ہے ”لاتفرقو“ یعنی ٹولیوں اور فرقوں میں مت بٹو، فرقہ واریت سے اتحاد و یکجہتی کو نقصان پہنچتا ہے۔
انہوں نے کہا کہ شیخ الاسلام ڈاکٹر محمد طاہرالقادری نے علم کی بنیادپر تمام مکتب فکر کو ہمیشہ جمع کیا ہے، 15دسمبر کو وطن عزیز میں ختم صحیح البخاری کے تاریخی موقع پر ملک بھر سے ہزار ہا علما و مشائخ کو جمع کیا گیا جس کے ان شا اللہ تعالیٰ دور رس نتائج برآمد ہوں گے۔ انہوں نے کہا کہ شیخ الاسلام ڈاکٹر محمد طاہرالقادری کا یہ پیغام ہے کہ اُمت علم و تحقیق کی بنیاد پر متحد ہو۔
