بالی ووڈ اداکار نیل نتن مکیش نے ایک دلچسپ اور حیران کن واقعے کا ذکر کیا ہے، جہاں ان کی غیر معمولی گوری رنگت نے انہیں مشکل میں ڈال دیا تھا۔
معروف گلوکار مکیش کے بیٹے اور بالی ووڈ کے مشہور اداکار نیل نتن مکیش کے ساتھ نیویارک ایئرپورٹ پر ایک انوکھا واقعہ پیش آیا۔
نیل نتن مکیش، جو اپنی جاذب نظر شخصیت اور خوبصورتی کے لیے جانے جاتے ہیں، کو صرف اس لیے امیگریشن حکام نے حراست میں لے لیا کیونکہ ان کا رنگ بہت زیادہ گورا تھا۔ حکام کو یقین نہیں ہو رہا تھا کہ وہ بھارتی شہری ہیں۔
یہ واقعہ 2009 میں فلم ’’نیویارک‘‘ کی شوٹنگ کے دوران پیش آیا۔ جب نیل نیویارک ایئرپورٹ پر پہنچے، تو امیگریشن افسران نے انہیں روکا اور بھارتی ہونے کا ثبوت طلب کیا۔ اگرچہ نیل کے پاس بھارتی پاسپورٹ موجود تھا، لیکن حکام کو اس پر شک تھا۔
نیل کی بات کے مطابق، انہیں کئی گھنٹوں تک امیگریشن حکام کی جانب سے حراست میں رکھا گیا اور سخت سوالات کیے گئے۔ اس دوران انہیں اپنی وضاحت دینے کا بھی زیادہ موقع نہیں ملا۔
نیل نے مزید بتایا کہ آخر کار انہوں نے حکام سے کہا کہ وہ گوگل پر ان کے بارے میں تلاش کریں۔ یہ سن کر افسران حیران ہو گئے اور پھر نیل کے خاندان کے بارے میں سوالات کرنے لگے۔
یہ دلچسپ واقعہ نیل نتن مکیش کے لیے ایک یادگار لمحہ بن گیا جہاں ان کی رنگت ہی مسئلے کی وجہ بنی۔
