ابوظہبی پولیس نے شہریوں کو خبردار کیا ہے کہ وہ سوشل میڈیا پر اجنبی افراد سے دوستی نہ کریں اور آن لائن بلیک میلنگ کے شکار ہو کر کسی کو بھتہ ادا نہ کریں۔ غیر ملکی خبررساں ادارے کے مطابق، ابوظہبی پولیس نے اپنی آگاہی مہم "ابواب” کی ایک نئی قسط جاری کی ہے، جس میں سوشل میڈیا پر نامعلوم افراد کے ساتھ رابطے کے خطرات اور آن لائن بلیک میلنگ کے ممکنہ نتائج کو اجاگر کیا گیا ہے۔
تازہ ترین قسط میں رہائشیوں کو آن لائن بھتہ خوری کے نتائج سے آگاہ کرنے کے لیے حقیقی زندگی کے منظرنامے پیش کیے گئے ہیں۔ اس میں واضح کیا گیا ہے کہ بلیک میلنگ ایک سنگین جرم ہے، جس کی قانون کے تحت سزا دی جا سکتی ہے۔ پولیس نے عوام پر زور دیا ہے کہ وہ بھتہ خوروں کے مطالبات پر عمل نہ کریں اور نہ ہی دھمکیوں کے تحت رقم ادا کریں۔
حکام نے بتایا کہ سائبر بلیک میلنگ کے متاثرین ٹول فری نمبر 8002626 (AMAN2626) پر کال کر کے، 2828 پر ٹیکسٹ میسج بھیج کر، یا [email protected] پر ای میل کر کے امن سروس کے ذریعے خفیہ طور پر مفت مدد حاصل کر سکتے ہیں۔
ابوظہبی پولیس اصل واقعات پر مبنی ڈرامائی آگاہی مواد تیار کرنے کے ساتھ ساتھ عوامی سلامتی کے بارے میں شعور بیدار کرنے اور سائبر جرائم کی روک تھام کے لیے کوششیں جاری رکھے ہوئے ہے۔ وفاقی حکم نامے کے مطابق، 2021 کے آرٹیکل (42) میں سائبر بھتہ خوری اور دھمکیوں کے لیے سخت سزائیں مقرر کی گئی ہیں۔
قانون کے مطابق، انفارمیشن نیٹ ورکس یا ڈیجیٹل ٹولز کا استعمال کرتے ہوئے دوسروں کو بلیک میل کرنے یا دھمکیاں دینے والے افراد کو 2 سال تک قید اور 250,000 درہم سے 500,000 درہم تک جرمانے کا سامنا کرنا پڑ سکتا ہے۔ اگر آن لائن دھمکی میں کسی جرم یا توہین آمیز فعل میں زبردستی شامل ہو، تو سزا 10 سال تک کی قید تک بڑھ سکتی ہے۔
ابوظہبی پولیس کا یہ اقدام شہریوں کو سائبر جرائم سے بچانے اور آن لائن محفوظ رہنے کے لیے آگاہی فراہم کرنے کی کوششوں کا حصہ ہے۔
