بیجنگ:چین نے آج سے امریکی مصنوعات پر اضافی درآمدی ٹیکس نافذ کرنے کا اعلان کر دیا، جس سے دنیا کی دو بڑی معیشتوں کے درمیان تجارتی کشیدگی مزید شدت اختیار کر سکتی ہے۔
تفصیلات کے مطابق، چینی حکام نے اعلان کیا ہے کہ امریکی کوئلے اور مائع قدرتی گیس پر 15 فیصد سرحدی ٹیکس لگایا جائے گا، جبکہ امریکی خام تیل، زرعی مشینری اور بڑی انجن والی گاڑیوں پر 10 فیصد ٹیرف عائد کیا جائے گا۔ یہ اقدام ایسے وقت میں اٹھایا گیا جب 4 فروری کو امریکی صدر نے اپنے عہدے کا حلف اٹھانے کے فوراً بعد چینی مصنوعات پر 10 فیصد محصول عائد کیا تھا، جس کے ردعمل میں چین نے بھی نصف گھنٹے بعد امریکی مصنوعات پر 10 فیصد ٹیکس لگا دیا تھا۔
امریکی صدر ڈونلڈ ٹرمپ نے گزشتہ جمعہ کو اعلان کیا تھا کہ وہ مزید ممالک پر بھی دوطرفہ محصولات عائد کرنے کا ارادہ رکھتے ہیں تاکہ امریکہ کے تجارتی تعلقات کو نئی شکل دی جا سکے اور ملکی بجٹ مسائل کو کم کیا جا سکے۔ اس دوران، انہوں نے جاپان کے وزیر اعظم شیگیرو ایشیبا سے ملاقات کے دوران دیگر تجارتی شراکت داروں کو بھی امریکی محصولات کا سامنا کرنے کی دھمکی دی۔
چین نے نہ صرف امریکی مصنوعات پر اضافی ٹیکس عائد کیے ہیں بلکہ 25 نایاب دھاتوں پر بھی برآمدی کنٹرول نافذ کر دیا ہے، جو کہ برقی مصنوعات اور فوجی سازوسامان کی تیاری میں کلیدی کردار ادا کرتی ہیں۔ یہ اقدامات دونوں ممالک کے درمیان جاری معاشی محاذ آرائی کو مزید پیچیدہ بنا سکتے ہیں۔
