پاکستان میں 29 سال بعد چیمپئنز ٹرافی کا انعقاد ہورہا ہے، اور آج سے یہ ایونٹ کراچی میں شروع ہونے جا رہا ہے۔ پہلا میچ پاکستان اور نیوزی لینڈ کے درمیان کھیلا جائے گا، جبکہ صدر مملکت آصف علی زرداری افتتاحی تقریب کے مہمان خصوصی ہوں گے۔ کرکٹ شائقین کے لیے خصوصی ٹریفک پلان بھی جاری کر دیا گیا ہے، تاکہ میچ کے دوران آمدورفت میں کسی قسم کی پریشانی نہ ہو۔
کراچی کے نیشنل اسٹیڈیم میں ہونے والے چیمپئنز ٹرافی کے میچز کے لیے ٹریفک پلان جاری کر دیا گیا ہے۔ 21 فروری اور یکم مارچ کو ہونے والے مقابلوں کے دوران سر شاہ سلیمان روڈ عام ٹریفک کے لیے کھلا رہے گا، جبکہ اسٹیڈیم آنے والے شائقین نیشنل کوچنگ سینٹر اور چائنا گراؤنڈ میں گاڑیاں پارک کریں گے۔
کارساز سے آنے والے تماشائی فلائی اوور کے نیچے سے کوچنگ سینٹر اور چائنا گراؤنڈ جا سکیں گے۔ ہیوی ٹریفک کے لیے سہراب گوٹھ سے نیپا، لیاقت آباد نمبر 10 سے حسن اسکوائر، اور پیپلز چورنگی سے یونیورسٹی روڈ تک مخصوص راستے دیے گئے ہیں۔ تاہم، کارساز سے اسٹیڈیم، ملینیم سے نیو ٹاؤن، اور اسٹیڈیم سگنل سے حسن اسکوائر جانے والے راستے ہیوی ٹریفک کے لیے بند ہوں گے۔
ڈی آئی جی ٹریفک نے شائقین سے درخواست کی ہے کہ وہ اپنی گاڑیاں اور موٹر سائیکلیں سڑک یا سروس روڈ پر کھڑی نہ کریں بلکہ مختص کردہ پارکنگ ایریاز کا استعمال کریں۔
چیمپئنز ٹرافی کی افتتاحی تقریب میں پاک ایئرفورس کے "شیر دل اسکواڈرن” کی جانب سے شاندار فلائی پاسٹ کا مظاہرہ کیا جائے گا، جبکہ تقریب کے مہمان خصوصی صدر مملکت آصف علی زرداری ہوں گے۔
ٹورنامنٹ کے بہترین انعقاد کے لیے چیئرمین پاکستان کرکٹ بورڈ (پی سی بی) محسن نقوی کی زیر صدارت قذافی اسٹیڈیم میں ایک اہم اجلاس بھی ہوا، جس میں انتظامات کا تفصیلی جائزہ لیا گیا۔ محسن نقوی نے کہا کہ پاکستان کے لیے یہ ایک تاریخی موقع ہے اور ہم اس ایونٹ کا شاندار انعقاد کر کے ملک کا وقار بلند کریں گے۔
پاکستانی ٹیم کے کپتان محمد رضوان نے چیمپئنز ٹرافی جیتنے کے عزم کا اظہار کرتے ہوئے کہا کہ ٹیم کے تمام کھلاڑی جیت کے لیے بھرپور محنت کریں گے۔ ان کا کہنا تھا کہ نیوزی لینڈ کو ہرانے کے لیے بہترین کھیل پیش کرنا ہوگا۔ انہوں نے مزید کہا کہ بابر اعظم ٹیم کے بہترین کھلاڑی ہیں اور وہی اننگز کا آغاز کریں گے۔
پاکستان کے اسٹار بیٹر بابر اعظم نے کہا کہ 2017 کی چیمپئنز ٹرافی اور آج کے حالات میں بہت فرق ہے، لیکن ان کا عزم وہی ہے کہ پاکستان میں ہونے والے اس ایونٹ کو یادگار بنایا جائے۔ انہوں نے 2017 کی جیت کی خوبصورت یادوں کو تازہ کرتے ہوئے فخر زمان کی سنچری، محمد عامر کی شاندار بولنگ اور فائنل کے آخری لمحات کو بہترین قرار دیا۔
پاکستانی شائقین اور کرکٹ کے دیوانے آج کے تاریخی لمحے کے شدت سے منتظر ہیں، جہاں چیمپئنز ٹرافی کا آغاز ایک زبردست میچ سے ہوگا!
