چیمپئنز ٹرافی کے دوسرے میچ میں بھارت نے شاندار کارکردگی دکھاتے ہوئے بنگلہ دیش کو 6 وکٹوں سے ہرادیا۔ بھارتی ٹیم نے 229 رنز کا ہدف 47 ویں اوور میں حاصل کر لیا۔ شبھمن گل کی شاندار سنچری اور محمد شامی کی تباہ کن بولنگ نے بھارت کی جیت میں اہم کردار ادا کیا۔
دبئی میں کھیلے گئے آئی سی سی چیمپئنز ٹرافی کے دوسرے میچ میں بھارت نے بنگلہ دیش کو 6 وکٹوں سے شکست دے کر ایونٹ میں اپنی پہلی کامیابی حاصل کی۔
بنگلہ دیش نے پہلے بیٹنگ کرتے ہوئے 50 اوورز میں 228 رنز بنائے اور پوری ٹیم آل آؤٹ ہوگئی۔ توحید ہریدوئے 100 رنز کی عمدہ اننگز کھیل کر نمایاں رہے، جبکہ جاکر علی نے 68 رنز بنائے۔ تنزید حسن 25، رشاد حسین 18، مہدی حسن 5 اور تسکین احمد 3 رنز بنا سکے۔ مشفق الرحمان، کپتان نجم الحسن شانتو، تنظیم حسن ثاقب اور سومیا سرکار بغیر کوئی رن بنائے پویلین لوٹ گئے۔
بھارت کی جانب سے محمد شامی کی تباہ کن بولنگ نے بنگلہ دیش کے بیٹنگ آرڈر کو مشکلات میں ڈال دیا۔ شامی نے 5 کھلاڑیوں کو آؤٹ کیا، ہرشت رانا نے 3 جبکہ اکشر پٹیل نے 2 وکٹیں حاصل کیں۔
بھارت نے 229 رنز کے ہدف کا تعاقب پراعتماد انداز میں کیا اور 47 ویں اوور میں 4 وکٹوں کے نقصان پر ہدف حاصل کر لیا۔ بھارتی بلے بازوں میں شبھمن گل نے شاندار بیٹنگ کرتے ہوئے 101 رنز کی ناقابلِ شکست اننگز کھیلی، جبکہ کے ایل راہول 41 رنز بنا کر ناٹ آؤٹ رہے۔ کپتان روہت شرما نے 41، ویرات کوہلی نے 22، شریاس ایر نے 15 اور اکشر پٹیل نے 8 رنز بنائے۔
بنگلہ دیش کے بولرز کی کارکردگی زیادہ متاثر کن نہ رہی۔ رشاد حسین نے 2 وکٹیں حاصل کیں، جبکہ تسکین احمد اور مستفیض الرحمان نے 1، 1 کھلاڑی کو آؤٹ کیا۔
بھارت کی اس کامیابی کے بعد چیمپئنز ٹرافی میں ان کی پوزیشن مزید مستحکم ہوگئی، جبکہ بنگلہ دیش کو اپنی غلطیوں سے سیکھ کر اگلے میچز میں بہتر کارکردگی دکھانے کی ضرورت ہے۔
