اسلام آباد کی ضلعی انتظامیہ نے سیکٹر ایف-10 میں قائم غیر سرکاری تنظیم (این جی او) پتن کا دفتر سیل کردیا۔ ضلعی انتظامیہ کا کہنا ہے کہ یہ تنظیم 2019 میں تحلیل کردی گئی تھی اور آج تک کسی عدالت نے اس فیصلے کو منسوخ نہیں کیا۔
ضلعی انتظامیہ کے مطابق این جی او پتن کو قانونی طور پر 2019 میں ختم کردیا گیا تھا، تاہم تنظیم بغیر کسی قانونی جواز کے اپنے معاملات چلا رہی تھی، جس کی بنا پر اس کے دفتر کو سیل کردیا گیا ہے۔
یہ کارروائی ایسے وقت میں کی گئی ہے جب حالیہ دنوں میں پاکستان تحریک انصاف (پی ٹی آئی) نے عالمی مالیاتی فنڈ (آئی ایم ایف) مشن کو ایک ڈوزیئر اور خط بھیجا تھا، جس میں مبینہ انتخابی دھاندلی کی تفصیلات شامل کی گئی تھیں۔
قومی اسمبلی میں قائد حزب اختلاف اور پی ٹی آئی کے رہنما عمر ایوب نے کہا تھا کہ آئی ایم ایف کو 2024 کے انتخابات سے متعلق این جی او پتن کی رپورٹ بھی فراہم کی گئی ہے۔ ان کے مطابق اس ڈوزیئر میں انتخابی عمل سے متعلق تفصیلات اور چیف جسٹس کو بھجوایا گیا خط بھی شامل ہے، جو آئی ایم ایف کے وفد کو بھیجا گیا ہے۔
