پاکستان میں رمضان المبارک 1446 ہجری کا چاند نظر نہیں آیا، جس کے بعد مرکزی رویت ہلال کمیٹی نے اعلان کیا کہ پہلا روزہ اتوار 2 مارچ 2025 کو ہوگا۔ اجلاس میں اتفاق رائے سے فیصلہ کیا گیا، جبکہ سپارکو کی پیش گوئی بھی چاند کے نظر نہ آنے کی تصدیق کرتی ہے۔ سعودی عرب میں رمضان کا آغاز یکم مارچ سے ہونے کا امکان ہے۔
تفصیلات کے مطابق رمضان المبارک 1446 ہجری کا چاند دیکھنے کے لیے مرکزی رویت ہلال کمیٹی کا اجلاس پشاور کے اوقاف ہال میں منعقد ہوا، جس کی صدارت مولانا عبدالخبیر آزاد نے کی۔ اجلاس میں کمیٹی کے اراکین کے علاوہ محکمہ موسمیات، سپارکو اور دیگر متعلقہ اداروں کے نمائندے بھی شریک ہوئے۔
اجلاس کے دوران کراچی، کوئٹہ، اسلام آباد، لاہور اور ملک کے دیگر شہروں میں زونل رویت ہلال کمیٹیوں کے اجلاس بھی منعقد ہوئے، مگر کسی بھی مقام سے چاند نظر آنے کی شہادت موصول نہیں ہوئی۔
اجلاس کے اختتام پر مولانا عبدالخبیر آزاد نے بتایا کہ ملک کے بیشتر حصوں میں مطلع ابر آلود تھا، جبکہ بعض مقامات پر موسم صاف بھی رہا۔ تاہم، کسی بھی علاقے سے چاند نظر آنے کی کوئی شہادت نہیں ملی، جس کے بعد اتفاق رائے سے فیصلہ کیا گیا کہ رمضان المبارک کا پہلا روزہ اتوار 2 مارچ 2025 کو رکھا جائے گا۔
سپارکو کے مطابق رمضان کا نیا چاند 28 فروری 2025 کو پاکستان کے معیاری وقت کے مطابق 5 بج کر 45 منٹ پر پیدا ہوگا۔ تاہم، 28 فروری کی شام غروبِ آفتاب کے وقت چاند کی عمر صرف 12 گھنٹے ہوگی اور اس کی بلندی 5 ڈگری ہونے کی وجہ سے اس کا نظر آنا ممکن نہیں ہوگا۔
مزید برآں، چاند اور سورج کے درمیان زاویے کا فاصلہ 7 ڈگری ہوگا، جس کے باعث چاند انسانی آنکھ سے دکھائی نہیں دے سکے گا۔ ان عوامل کو مدنظر رکھتے ہوئے سپارکو نے پیش گوئی کی ہے کہ پاکستان میں رمضان 2 مارچ 2025 سے شروع ہوگا۔
سپارکو کا یہ بھی کہنا ہے کہ سعودی عرب میں 28 فروری کو چاند نظر آنے کا امکان ہے، جس کے تحت وہاں رمضان کا آغاز یکم مارچ سے ہوسکتا ہے، جبکہ شوال کا چاند 30 مارچ کو نظر آنے کی توقع ہے، جس کے نتیجے میں عید الفطر 31 مارچ کو ہوسکتی ہے۔
سپارکو کے ترجمان نے واضح کیا کہ رمضان اور عید کے چاند کی حتمی رویت کا فیصلہ رویت ہلال کمیٹی ہی کرے گی۔
