آج کے دور میں ہم میں سے اکثر لوگ دن بھر اسمارٹ فون کا استعمال کرتے ہیں، لیکن کیا آپ نے کبھی سوچا ہے کہ اگر ہم صرف تین دن کے لیے سوشل میڈیا اور غیر ضروری فون کے استعمال سے دور ہو جائیں تو ہمارے دماغ پر کیا اثر پڑے گا؟ نئی تحقیق سے پتا چلا ہے کہ صرف 72 گھنٹوں کے لیے اسمارٹ فون سے وقفہ لینا دماغی سرگرمیوں میں نمایاں تبدیلیاں لا سکتا ہے، جو ہماری توجہ، یادداشت اور ذہنی سکون کو بہتر بنا سکتا ہے۔
اسمارٹ فون ہماری زندگی کا ایک لازمی جزو بن چکا ہے۔ صبح آنکھ کھلنے سے لے کر رات سونے تک ہم اس کی اسکرین پر نظریں جمائے رکھتے ہیں۔ لیکن ماہرین کا کہنا ہے کہ اگر ہم کچھ وقت کے لیے فون کے استعمال کو کم کریں تو ہمارے دماغ پر مثبت اثرات مرتب ہو سکتے ہیں۔
جرمنی کی ہائیڈلبرگ یونیورسٹی اور کولون یونیورسٹی کے محققین نے 18 سے 30 سال کے 25 نوجوانوں پر ایک تجربہ کیا۔ ان نوجوانوں سے کہا گیا کہ وہ تین دن کے لیے اسمارٹ فون کا استعمال انتہائی محدود کر دیں اور صرف ضروری کاموں یا اہم رابطے کے لیے فون استعمال کریں۔
تحقیق کے دوران، ماہرین نے شرکاء کے دماغی اسکینز اور نفسیاتی ٹیسٹ کیے تاکہ یہ جانا جا سکے کہ فون کا کم استعمال دماغ کی سرگرمیوں پر کیا اثر ڈالتا ہے۔ حیران کن طور پر، تحقیق میں یہ بات سامنے آئی کہ دماغ کے وہ حصے جو عام طور پر نشے کی عادات اور انعامی نظام سے منسلک ہوتے ہیں، ان میں واضح تبدیلی دیکھی گئی۔
محققین نے شرکاء کو مختلف تصاویر دکھائیں، جن میں اسمارٹ فون اور دیگر عام اشیاء جیسے پھول اور کشتیوں کی تصاویر شامل تھیں۔ تین دن کے وقفے کے بعد دماغ کی سرگرمی میں نمایاں تبدیلیاں دیکھنے کو ملیں، جو یہ ثابت کرتی ہیں کہ اسمارٹ فون کا زیادہ استعمال ہمارے دماغی افعال کو متاثر کر سکتا ہے۔
اگر صرف 72 گھنٹے کے لیے فون کے استعمال کو محدود کرنے سے دماغ میں تبدیلی آ سکتی ہے، تو ذرا سوچیں کہ طویل مدت تک ایسا کرنے کے کیا فوائد ہو سکتے ہیں! ماہرین کا کہنا ہے کہ اسمارٹ فون سے وقفہ لینا ذہنی سکون کے ساتھ ساتھ توجہ اور یادداشت کو بھی بہتر بنا سکتا ہے۔
کیا آپ یہ چیلنج قبول کریں گے؟ تین دن کے لیے سوشل میڈیا اور غیر ضروری فون کے استعمال کو ترک کریں اور حقیقی زندگی کے لمحات، مطالعے، قدرت کے مناظر، یا اپنے پیاروں کے ساتھ وقت گزارنے پر توجہ دیں۔
یہ تین دن آپ کی زندگی میں مثبت تبدیلی لا سکتے ہیں!
