کراچی کنگز کے آل راؤنڈر عامر جمال پر پشاور زلمی کے خلاف میچ میں ضابطہ اخلاق کی خلاف ورزی کی وجہ سے 5 فیصد میچ فیس کا جرمانہ عائد کیا گیا۔ یہ واقعہ اس وقت پیش آیا جب عامر نے حسین طلعت کو آؤٹ کرنے کے بعد نامناسب الفاظ کہے۔ انہوں نے اپنی غلطی تسلیم کی اور سزا قبول کر لی۔ کراچی کنگز نے یہ سنسنی خیز میچ 2 وکٹوں سے جیت لیا تھا۔
کراچی: کراچی کنگز کے آل راؤنڈر عامر جمال کو پشاور زلمی کے خلاف میچ کے دوران ضابطہ اخلاق کی خلاف ورزی کرنے پر جرمانہ کیا گیا ہے۔یہ واقعہ 21 اپریل 2025 کو نیشنل بینک اسٹیڈیم کراچی میں کھیلے گئے پاکستان سپر لیگ (پی ایس ایل) کے میچ کے دوران پیش آیا، جہاں کراچی کنگز نے پشاور زلمی کو سنسنی خیز مقابلے کے بعد 2 وکٹوں سے شکست دی تھی۔
میچ کے دوران عامر جمال پر ضابطہ اخلاق کے لیول 1 کی خلاف ورزی کا الزام لگایا گیا، جس کی وجہ سے ان کی میچ فیس کا 5 فیصد جرمانہ کیا گیا۔انٹرنیشنل کرکٹ کونسل (آئی سی سی) کے قوانین کے تحت عامر جمال کو آرٹیکل 2.5 کی خلاف ورزی کا مرتکب پایا گیا۔
یہ قانون کہتا ہے کہ اگر کوئی کھلاڑی نامناسب زبان، اشاروں یا حرکات کا استعمال کرے جو بلے باز کو مشتعل کر سکتے ہوں، تو اس پر جرمانہ عائد کیا جا سکتا ہے تاکہ مستقبل میں ایسی حرکتوں سے بچا جا سکے۔یہ واقعہ پشاور زلمی کی بیٹنگ کے دوران پہلی اننگز کے 15ویں اوور میں پیش آیا۔
عامر جمال نے اس اوور میں پشاور زلمی کے بلے باز حسین طلعت کو آؤٹ کیا تھا۔آؤٹ کرنے کے بعد عامر جمال بلے باز کے قریب گئے اور انہوں نے کچھ نامناسب الفاظ کہے۔اس حرکت کو امپائرز نے ضابطہ اخلاق کی خلاف ورزی قرار دیا۔
عامر جمال نے اپنی غلطی کا اعتراف کیا۔انہوں نے میچ ریفری افتخار احمد کی طرف سے تجویز کردہ سزا کو قبول کر لیا۔یہ الزامات آن فیلڈ امپائرز فیصل خان آفریدی اور پال ریفل نے لگائے تھے۔
