برازیل کے سانتا باربرا جزیرے پر بکریاں 200 سال سے بغیر پانی پیے زندہ ہیں، جو سائنسدانوں کے لیے حیران کن ہے۔ یہ جزیرہ تازہ پانی کے بغیر ہے، پھر بھی بکریاں سمندری پانی یا پودوں سے نمی لے کر زندہ رہتی ہیں۔ یہ بکریاں 250 سال قبل ملاحوں نے وہاں چھوڑی تھیں۔
برازیل کے سانتا باربرا جزیرے پر بکریوں کا 200 سال سے زیادہ عرصے تک بغیر پانی پیے زندہ رہنا ناقابل یقین لگتا ہے، لیکن یہ سچ ہے۔ یہ جزیرہ برازیل کے شمال مشرقی ساحل کے قریب واقع ہے۔
سانتا باربرا ابرولہوس جزائر کا سب سے بڑا جزیرہ ہے اور یہ باہیا ریاست کے ساحل سے تقریباً 70 کلومیٹر دور ہے۔ یہ جزیرہ برازیل کی بحریہ کے کنٹرول میں ہے اور عام لوگوں کا وہاں جانا ممنوع ہے۔
تاریخی معلومات کے مطابق تقریباً 250 سال پہلے نوآبادیاتی دور میں ملاحوں نے اس جزیرے پر بکریوں کو خوراک کے ذخیرے کے طور پر چھوڑا تھا۔ وقت گزرنے کے ساتھ ان بکریوں نے جزیرے کے خشک اور مشکل ماحول میں خود کو ڈھال لیا۔
اس جزیرے پر تازہ پانی کا کوئی معلوم ذریعہ نہیں ہے اور سائنسدانوں نے کبھی ان بکریوں کو پانی پیتے نہیں دیکھا۔ ان کی بقا کے بارے میں دو اہم نظریات ہیں۔
پہلا نظریہ یہ ہے کہ کچھ ماہرین کے خیال میں یہ بکریاں سمندری پانی پینے کی عادی ہو گئی ہیں اور یہ عادت ان کی نسلوں میں منتقل ہوتی رہی ہے۔
دوسرا نظریہ یہ ہے کہ بکریاں جزیرے پر موجود "بیلڈروگا” نامی پودے سے نمی حاصل کرتی ہیں، جو پانی کی مقدار سے بھرپور ہوتا ہے۔
