امریکا میں ایک خاتون کی انوکھی عادت نے سب کو حیران کر دیا ہے، جو گزشتہ پانچ برس سے ناک کے ذریعے خوراک حاصل کر رہی ہیں۔
امریکی ٹی وی شو My Strange Addiction کے ساتویں سیزن میں ورجینیا سے تعلق رکھنے والی کیتھرین نے اپنی غیر معمولی عادت کا انکشاف کیا۔ انہوں نے بتایا کہ کمیونٹی کالج تک ان کا کھانے پینے کا طریقہ بالکل عام تھا، تاہم یہ عادت دراصل ایک مذاق اور چیلنج کے طور پر شروع ہوئی۔
کیتھرین کے مطابق انہوں نے پہلی بار ذائقہ دار فروٹ ڈرنک کو ناک کے ذریعے پینے کی کوشش کی، جس کے بعد انہیں چکر تو آئے، لیکن ان کا کہنا ہے کہ یہ تجربہ منہ سے پینے کے مقابلے میں زیادہ تیز اور مختلف ذائقے والا تھا، جس نے انہیں حیران کر دیا۔
اسی تجربے کے بعد وہ آہستہ آہستہ ناک کے ذریعے خوراک لینے کی عادی ہو گئیں اور اب تقریباً پانچ برس سے وہ اپنی تمام غذائیں اسی طریقے سے استعمال کر رہی ہیں۔
کیتھرین بتاتی ہیں کہ وہ پالک اور مشروم کو آملیٹ کے ساتھ بلینڈ کر کے، اسٹیک اور پالک کو مائع شکل میں، کافی حتیٰ کہ تیکھا گواکامول بھی ناک کے راستے نوش کرتی ہیں۔
ان کا دعویٰ ہے کہ اس غیر معمولی عادت سے انہیں کوئی جسمانی نقصان نہیں پہنچا، تاہم وہ یہ بھی تسلیم کرتی ہیں کہ اس وجہ سے ان کے دوستوں اور خاندان کے افراد ان سے دور ہوتے جا رہے ہیں، کیونکہ اکثر لوگ اس طرزِ زندگی کو قبول نہیں کر پاتے۔
