انڈہ وٹامنز اور معدنیات کا خزانہ ہے، جس میں وٹامن A، B12، D، آئرن، کیلشیم، میگنیشیم اور زنک شامل ہیں۔ لیکن روزمرہ کی خوراک میں زیادہ صحت بخش کیا ہے، ابلا ہوا انڈا یا آملیٹ؟
ابلا ہوا انڈا ان افراد کے لیے بہترین انتخاب ہے جن کے پاس وقت کم ہوتا ہے اور وہ کم کیلوریز کے ساتھ زیادہ پروٹین چاہتے ہیں۔
یہ انڈہ بغیر کسی اضافی اجزاء کے پکایا جاتا ہے، اس لیے کم کیلوریز پر مشتمل ہوتا ہے۔ ابلے ہوئے انڈے اپنی غذائیت اور پروٹین کو مکمل طور پر محفوظ رکھتے ہیں۔ انڈے میں موجود اینٹی آکسیڈینٹس آنکھوں کی صحت کے لیے اہم ہیں اور عمر بڑھنے کے ساتھ پیدا ہونے والی بیماریوں سے بچاؤ میں مددگار ہیں۔
آملیٹ ان افراد کے لیے موزوں ہے جو غذائیت سے بھرپور اور متوازن خوراک لینا چاہتے ہیں۔
آملیٹ میں سبزیاں، پنیر، یا دیگر اجزاء شامل کیے جا سکتے ہیں، جس سے یہ زیادہ کیلوریز اور سیر شدہ چکنائی والا ہو سکتا ہے۔سبزیوں کے ساتھ تیار کیا گیا آملیٹ ذائقہ دار ہونے کے ساتھ ساتھ وٹامنز اور منرلز کا بھی بہترین ذریعہ بن جاتا ہے۔آملیٹ میں اپنی پسند کے مطابق اجزاء شامل کر کے اسے مزید غذائیت بخش اور ذائقہ دار بنایا جا سکتا ہے۔
ابلے ہوئے انڈے اور آملیٹ دونوں اپنی جگہ مفید ہیں، اور ان کا انتخاب آپ کے غذائی اہداف اور ترجیحات پر منحصر ہے۔ دونوں ہی وٹامنز اور معدنیات کے بہترین ذرائع ہیں۔ اگر کم کیلوریز اور زیادہ پروٹین چاہیے تو ابلا ہوا انڈہ منتخب کریں، جبکہ ذائقے اور غذائیت کا امتزاج چاہتے ہیں تو آملیٹ بہترین رہے گا۔
