بیجنگ: مقبول سوشل میڈیا ایپ ٹک ٹاک نے امریکا میں عائد پابندیوں سے بچنے کے لیے متبادل اقدامات کیے ہیں، جس کے تحت اینڈرائیڈ صارفین کو اپنی ویب سائٹ سے براہ راست ایپ ڈاؤن لوڈ اور انسٹال کرنے کی اجازت دی گئی ہے۔
ایپل اور گوگل کے ایپ اسٹورز پر ٹک ٹاک اب بھی بحال نہیں ہوا، کیونکہ 19 جنوری کو نافذ ہونے والے ایک امریکی قانون کے تحت بائٹ ڈانس کو قومی سلامتی کے خدشات کی بنیاد پر ایپ فروخت کرنی ہوگی، ورنہ اسے پابندی کا سامنا کرنا پڑے گا۔
امریکی صدر ڈونلڈ ٹرمپ، جنہوں نے قانون کے نفاذ کے اگلے ہی دن عہدہ سنبھالا، اس پر 75 دن کی تاخیر کے لیے ایگزیکٹو آرڈر پر دستخط کر چکے ہیں۔ انہوں نے کہا ہے کہ وہ ٹک ٹاک کی خریداری کے حوالے سے مختلف افراد اور کمپنیوں سے بات چیت کر رہے ہیں اور اس ماہ کے آخر تک کوئی حتمی فیصلہ کریں گے۔
ٹرمپ نے پیر کے روز ایک اور ایگزیکٹو آرڈر پر دستخط کیے، جس کے تحت سال کے اندر ایک خودمختار ویلتھ فنڈ بنانے کا حکم دیا گیا ہے۔ ان کے مطابق، یہ فنڈ ممکنہ طور پر ٹک ٹاک کو خریدنے کے لیے استعمال کیا جا سکتا ہے۔
امریکا میں ٹک ٹاک کے تقریباً 17 کروڑ صارفین ہیں، اور کمپنی کسی بھی ممکنہ پابندی سے بچنے کے لیے مختلف متبادل راستے تلاش کر رہی ہے۔
