جنوبی کوریا کے سائنس دانوں نے ایک نئی تحقیق میں ایسا ’سوئچ‘ دریافت کیا ہے جو کینسر سے متاثرہ خلیوں کو دوبارہ صحت مند حالت میں بحال کرنے کی صلاحیت رکھتا ہے۔
تازہ تحقیق میں ماہرین نے خلیوں کو مالیکیولر سطح پر متحرک کیا، جس سے یہ ممکن ہوا کہ کینسر زدہ خلیے اپنی اصل، صحت مند حالت میں واپس آ سکیں۔ یہ دریافت روایتی طریقہ علاج سے مختلف ہے، جس میں عام طور پر سرجری، تابکاری یا کیموتھراپی کے ذریعے متاثرہ خلیوں کو ختم کرنے پر توجہ دی جاتی ہے۔
میموریل سلوان کیٹرنگ کینسر سینٹر کی ریٹائرڈ اونکولوجسٹ ڈاکٹر ٹفنی ٹروسو-سینڈوول، جو اس تحقیق کا حصہ نہیں تھیں، کا کہنا تھا کہ یہ نیا طریقہ کینسر کے علاج کے روایتی نظریے سے مختلف ہے۔ یہ متاثرہ خلیوں کو مکمل طور پر ختم کرنے کے بجائے انہیں دوبارہ ری وائر کر کے صحت مند بنانے کا موقع فراہم کرتا ہے۔
انہوں نے وضاحت کرتے ہوئے کہا کہ اس عمل کو سمجھنے کے لیے 100 ڈگری سیلسیئس پر ابلتے پانی کی مثال دی جا سکتی ہے، جب پانی ایک مختصر لمحے کے لیے نہ مکمل مائع ہوتا ہے اور نہ ہی بھاپ۔ اسی طرح، کینسر کی نشوونما کے دوران ایک ایسا مرحلہ آتا ہے جب خلیے بیک وقت کینسر زدہ اور صحت مند ہوتے ہیں، اور یہی لمحہ علاج کے لیے اہم ثابت ہو سکتا ہے۔
اس جدید تحقیق نے کینسر کے علاج کے ایک تیسرے اور انقلابی طریقے کو جنم دیا ہے، جو مریضوں کو صحت مند خلیے دوبارہ حاصل کرنے کا ایک نیا امکان فراہم کر سکتا ہے۔
