لندن:برطانوی وزیر اعظم سر کیئر اسٹارمر نے یوکرین کی سلامتی کو یقینی بنانے کے لیے امن معاہدے کے تحت برطانوی فوجیوں کی یوکرین میں تعیناتی پر آمادگی کا اظہار کیا ہے۔
تفصیلات کے مطابق کیئر اسٹارمر نے اس بات پر زور دیا کہ یوکرین میں دیرپا امن قائم کرنا ضروری ہے تاکہ روسی صدر ولادیمیر پیوٹن کو مستقبل میں مزید جارحیت سے روکا جا سکے۔ انہوں نے کہا کہ یوکرین کی سلامتی صرف یوکرین کے لیے نہیں بلکہ پورے یورپ کے تحفظ کے لیے اہم ہے۔
یہ بیان پیرس میں یورپی رہنماؤں کے ہنگامی سربراہ اجلاس سے قبل سامنے آیا، جہاں برطانوی وزیر اعظم نے واضح کیا کہ برطانیہ ضرورت پڑنے پر اپنے فوجیوں کو یوکرین میں تعینات کرنے کے لیے تیار ہے۔
غیر ملکی میڈیا رپورٹس کے مطابق، برطانوی فوجیوں کو دیگر یورپی ممالک کے دستوں کے ساتھ یوکرین کے زیر قبضہ اور روس کے زیر قبضہ علاقوں کے درمیان سرحد پر تعینات کیا جا سکتا ہے۔
وزیر اعظم کا یہ اعلان ایسے وقت میں سامنے آیا جب برطانوی فوج کے سابق سربراہ لارڈ ڈینٹ نے میڈیا کو انٹرویو میں کہا تھا کہ برطانوی فوج اس قدر کمزور ہو چکی ہے کہ وہ مستقبل میں یوکرین میں کسی بھی امن مشن کی قیادت نہیں کر سکتی۔
کیئر اسٹارمر نے اس تاثر کو رد کرتے ہوئے کہا کہ یوکرین میں جنگ بندی کوئی عارضی وقفہ نہیں ہونا چاہیے، بلکہ یوکرین کے مستقبل کی سلامتی کے لیے مستقل حل کی ضرورت ہے۔
