دنیا کے معروف ارب پتی کاروباری شخصیت ایلون مسک کی جانب سے امریکی سرکاری ملازمین کے لیے متعارف کرائی گئی نئی پالیسی نے کھلبلی مچا دی ہے۔ ان کے اس اعلان کے بعد امریکی سرکاری اداروں میں بے چینی کی لہر دوڑ گئی ہے اور ملازمین اس فیصلے پر مختلف ردعمل دے رہے ہیں۔
ایلون مسک نے امریکی سرکاری ملازمین کو خبردار کرتے ہوئے کہا ہے کہ انہیں پورے ہفتے کی کارکردگی کی تفصیلات فراہم کرنا ہوں گی، ورنہ انہیں ملازمت سے مستعفی سمجھا جائے گا۔
انہوں نے سوشل میڈیا پلیٹ فارم ایکس (سابقہ ٹوئٹر) پر اپنی پوسٹ میں انکشاف کیا کہ امریکا کے محکمہ برائے حکومتی کارکردگی (DOGE) کے تحت کام کرنے والے وفاقی ملازمین کو ایک ای میل موصول ہوگی۔ اس ای میل کے جواب میں انہیں واضح طور پر یہ بتانا ہوگا کہ پورے ہفتے میں انہوں نے کتنا کام کیا ہے۔
ایلون مسک کا کہنا تھا کہ اگر کوئی ملازم اس ای میل کا جواب دینے میں ناکام رہا تو اسے ازخود مستعفی سمجھا جائے گا۔ ان کے اس بیان کے بعد امریکی سرکاری اداروں میں تشویش پھیل گئی ہے اور ملازمین اس غیر متوقع فیصلے پر حیرانگی اور پریشانی کا اظہار کر رہے ہیں۔
