رمضان المبارک کی آمد قریب ہے، اور دنیا بھر کے مسلمان اس مقدس مہینے کے استقبال کی تیاریوں میں مصروف ہیں۔ پاکستان میں بھی رمضان کے آغاز سے متعلق اہم پیش گوئی سامنے آئی ہے۔ ماہرین فلکیات کا کہنا ہے کہ نیا چاند 28 فروری کو پیدا ہوگا، تاہم اس کی عمر کم ہونے کے باعث 28 فروری کو چاند نظر آنے کے امکانات کم ہیں، جس کے باعث پہلا روزہ یکم مارچ کے بجائے 2 مارچ کو ہونے کا امکان ہے۔
تفصیلات کے مطابق دنیا بھر میں رمضان المبارک کا استقبال جوش و خروش سے کیا جا رہا ہے اور پاکستانی بھی اس مقدس مہینے کی تیاری میں مشغول ہیں۔
رمضان المبارک کا چاند دیکھنے کے لیے مرکزی رویت ہلال کمیٹی کا اجلاس کل پشاور میں ہوگا، جہاں چاند کے نظر آنے یا نہ آنے سے متعلق باضابطہ اعلان کیا جائے گا۔
ماہرین فلکیات کے مطابق نیا چاند 28 فروری کو صبح 5 بج کر 45 منٹ پر پیدا ہوگا، لیکن غروب آفتاب کے وقت اس کی عمر صرف 12 گھنٹے ہوگی، جس کے باعث 28 فروری کو چاند نظر آنے کے امکانات کم ہیں۔
ماہرین کا کہنا ہے کہ ملک میں رمضان المبارک 2 مارچ 2025 سے شروع ہونے کا امکان ہے، تاہم حتمی اعلان رویت ہلال کمیٹی کرے گی۔
سعودی عرب میں 28 فروری کو چاند نظر آنے کا امکان ہے، جبکہ شوال کا چاند 30 مارچ کو دیکھا جا سکتا ہے، جس کے مطابق عید الفطر 31 مارچ کو ہونے کا امکان ہے۔
یہ بات قابل ذکر ہے کہ اسلامی مہینوں کا آغاز چاند نظر آنے سے مشروط ہوتا ہے، تاہم ماہرین فلکیات کئی ماہ قبل پیش گوئی کرتے ہیں کہ کون سا اسلامی مہینہ کب شروع ہوگا۔
واضح رہے کہ رمضان المبارک قمری سال کا نواں مہینہ ہے، جو دنیا بھر کے مسلمانوں کے لیے مقدس حیثیت رکھتا ہے۔ اس مہینے میں مسلمان طلوع فجر سے غروب آفتاب تک روزہ رکھتے ہیں، اور عید الفطر اللہ کی رضا کے لیے روزے رکھنے والے بندوں کے لیے انعام کے طور پر منائی جاتی ہے۔
