اسلام آباد:پاکستان کو معاشی مشکلات میں چین کی جانب سے بڑا ریلیف مل گیا۔ چین نے پاکستان کے ذمے واجب الادا 2 ارب ڈالر قرض کی واپسی کی مدت میں مزید ایک سال کی توسیع کر دی، جس سے ملک کے زرمبادلہ کے ذخائر کو سہارا ملے گا۔
تفصیلات کے مطابق وزارت خزانہ کے اعلامیے میں کہا گیا ہے کہ پاکستان کے معاشی استحکام اور بحالی کے لیے دوست ملک چین کا تعاون مسلسل جاری ہے۔ اس سلسلے میں چین نے پاکستان کے ذمے واجب الادا 2 ارب ڈالر قرض کی مدت میں مزید ایک سال کی توسیع کر دی ہے۔
یہ قرض 24 مارچ کو واجب الادا تھا، تاہم اب پاکستان کو اس کی واپسی کے لیے مزید ایک سال کا وقت مل گیا ہے۔ وزارت خزانہ نے اس توسیع کی باضابطہ تصدیق کر دی ہے۔
اعلامیے کے مطابق، چین کے اس اقدام سے پاکستان کو زرمبادلہ کے ذخائر کو مستحکم رکھنے میں مدد ملے گی، جو ملکی معیشت کے لیے ایک مثبت پیشرفت ہے۔
