کراچی:میئر کراچی مرتضیٰ وہاب نے شہر کو خوبصورت بنانے کے لیے بڑے فیصلے کیے ہیں۔ انہوں نے عوامی دیواروں اور سڑکوں سے چاکنگ ہٹانے، تاریخی عمارتوں کے تحفظ، اور سڑکوں کے کنارے روایتی درخت لگانے کا حکم دیا۔ ساتھ ہی پلوں کے نیچے فوڈ پوائنٹس بند کرنے اور اہم سڑکوں کی تزئین و آرائش کے منصوبوں پر بھی بات کی۔
تفصیلات کے مطابق میئر کراچی بیرسٹر مرتضیٰ وہاب نے شہر کی خوبصورتی بڑھانے کے لیے اہم ہدایات جاری کی ہیں۔ انہوں نے حکم دیا کہ شہر بھر کی سڑکوں اور عوامی دیواروں پر کی گئی چاکنگ کو فوری طور پر ہٹایا جائے اور اس کے ذمہ داروں کے خلاف قانون کے مطابق کارروائی کی جائے۔
ان خیالات کا اظہار انہوں نے کراچی میٹروپولیٹن کارپوریشن (کے ایم سی) کے ہیڈ آفس میں کراچی بیوٹیفکیشن ٹاسک فورس کے اجلاس میں کیا۔ اس اجلاس میں کمشنر کراچی حسن نقوی، ڈی آئی جی ٹریفک پیر محمد شاہ، سالڈ ویسٹ مینجمنٹ بورڈ کے سربراہ، مختلف اضلاع کے ڈپٹی کمشنرز اور بلدیاتی اداروں کے حکام شریک تھے۔
میئر نے کہا کہ شہر کے پلوں اور فلائی اوورز کے نیچے خیراتی اداروں کی طرف سے بنائے گئے فوڈ ڈسٹری بیوشن پوائنٹس کو بند کر دیا جائے۔ انہوں نے زور دیا کہ کراچی کی اہم سڑکوں کے ساتھ موجود تاریخی عمارتوں کو محفوظ رکھا جائے گا۔ انہوں نے بتایا کہ عبداللہ ہارون روڈ پر 16 تاریخی عمارتیں موجود ہیں۔
اجلاس میں آئی آئی چندریگر روڈ پر مختلف اداروں کے سائن بورڈز کو ڈیجیٹل کرنے کی تجویز بھی سامنے آئی۔ میئر نے اعلان کیا کہ سڑکوں کے کنارے کونوکارپس پودوں اور درختوں کو ہٹا کر ان کی جگہ کراچی کے روایتی درخت لگائے جائیں گے۔
اس کے علاوہ، آئی آئی چندریگر روڈ، عبداللہ ہارون روڈ، شارع فیصل، شاہراہ پاکستان اور کارساز روڈ کی خوبصورتی کے منصوبوں پر تفصیلی بریفنگ دی گئی۔ میئر نے ہدایت کی کہ سوسائٹی قبرستان کی بیرونی دیوار کو خوبصورت اور دلکش انداز میں بنایا جائے تاکہ سڑک کی خوبصورتی بڑھے۔
انہوں نے شارع فیصل پر شادی ہالز کے لیے پارکنگ کی سہولتوں کو بہتر کرنے اور سڑک کے دونوں طرف سروس روڈز کو اپ گریڈ کرنے کی ضرورت پر بھی زور دیا۔
میئر کراچی کے شہر کو خوبصورت بنانے کے اہم اور بڑے فیصلے
شہر کے پلوں اور فلائی اوورز کے نیچے خیراتی اداروں کی طرف سے بنائے گئے فوڈ ڈسٹری بیوشن پوائنٹس کو بند کر دیا جائے،مرتضیٰ وہاب
