سوزوکی نے کلٹس اور سویفٹ کی قیمتوں میں نمایاں اضافہ کر دیا

پاک سوزوکی موٹر کمپنی نے اپنے ڈیلرز کو ایک نئے سرکلر میں سوزوکی کلٹس اور سویفٹ GL MT ماڈل کی نئی قیمتوں کا اعلان کیا ہے۔ یہ نئی قیمتیں فوراًنافذ ہو جائیں گی۔

کمپنی نے بتایا کہ کلٹس کے تمام ویرینٹس میں صارفین کی ضروریات کو دیکھتے ہوئے بہتری کی گئی ہے، جن میں حفاظت، آرام اور گاڑی کی مجموعی کارکردگی کو بہتر بنانے پر توجہ دی گئی ہے۔

سوزوکی کلٹس VXR کی قیمت میں 3 لاکھ 72 ہزار روپے کا اضافہ کیا گیا ہے۔ اب اس کی نئی قیمت 42 لاکھ 30 ہزار روپے ہے، جبکہ پہلے یہ 38 لاکھ 58 ہزار روپے میں فروخت ہوتی تھی۔

سوزوکی کلٹس VXL کی قیمت میں 72 ہزار روپے کا اضافہ ہوا ہے۔ اس کی نئی قیمت اب 43 لاکھ 16 ہزار روپے ہے، جبکہ اس سے پہلے یہ 42 لاکھ 44 ہزار روپے میں ملتی تھی۔

سوزوکی کلٹس AGS کی قیمت بھی 72 ہزار روپے بڑھائی گئی ہے۔ اب اس کی قیمت 46 لاکھ 18 ہزار روپے ہو گئی ہے، جبکہ پہلے یہ 45 لاکھ 46 ہزار روپے میں فروخت ہوتی تھی۔

کمپنی نے تمام ویرینٹس میں نئے حفاظتی فیچرز شامل کیے ہیں، جن میں ریئر سینٹر سیٹ بیلٹ، ریئر ہیڈ ریسٹرینٹ، ڈرائیور سیٹ بیلٹ بزر، اسپیڈو میٹر پر ڈسپلے، چائلڈ سیٹ گارنش، آئی ایس او فکس اینکر، فرنٹ سیٹ بیلٹ پری ٹینشنرز اور فورس لمیٹرز شامل ہیں۔

VXR MT ویرینٹ میں ڈرائیور اور مسافر کے لیے ایئر بیگز، اینٹی لاک بریکنگ سسٹم اور سیپرٹ ریئر سیٹ جیسے اضافی فیچرز بھی شامل کیے گئے ہیں۔

کمپنی کا کہنا ہے کہ ان حفاظتی فیچرز کا اضافہ ڈرائیور کے اعتماد اور مسافروں کی حفاظت کو بہتر بنانے کے عزم کو ظاہر کرتا ہے۔

سوزوکی نے اپنی مشہور گاڑی سویفٹ کی قیمت میں بھی 80 ہزار روپے کا اضافہ کیا ہے۔ اب اس کی نئی قیمت 44 لاکھ 16 ہزار روپے ہے، جبکہ اس سے پہلے یہ 43 لاکھ 36 ہزار روپے میں فروخت ہوتی تھی۔