نادیہ خان نے پہلگام فالس فلیگ آپریشن کو بے نقاب کر دیا

کراچی سے تعلق رکھنے والی پاکستانی اداکارہ اور ٹی وی میزبان نادیہ خان نے مقبوضہ جموں و کشمیر میں ہونے والے پہلگام حملے کو بھارت کا فالس فلیگ آپریشن قرار دیتے ہوئے اس کی سخت تنقید کی۔

اپنے ایک ویڈیو پیغام میں نادیہ خان نے کہا کہ بھارت کے پاس ایسی کون سی جدید ٹیکنالوجی ہے کہ وہ واقعے کے چند منٹ بعد ہی یہ فیصلہ کر لیتا ہے کہ حملہ پاکستان نے کیا؟ انہوں نے کہا کہ بھارتی حکومت اپنے ناپاک مقاصد کے لیے اپنے ہی لوگوں کو نشانہ بناتی ہے۔

نادیہ خان نے کہا کہ بھارت نے بغیر کسی تحقیق یا ثبوت کے پاکستان پر الزام لگایا۔ انہوں نے کہا کہ اس فالس فلیگ آپریشن کا اصل مقصد پاکستان کا پانی بند کرنے کے لیے جواز بنانا تھا۔ انہوں نے کہا کہ اب بھارتی عوام بھی اس حقیقت کو سمجھ رہے ہیں اور وہ بھی اس پر سوالات اٹھا رہے ہیں۔

نادیہ خان نے کہا کہ یہ فالس فلیگ آپریشن بھارت نے صرف اس لیے کیا تاکہ پاکستان کا پانی بند کیا جا سکے۔ انہوں نے کہا کہ نہ تو پاکستان، نہ بھارت کے لوگ اور نہ ہی دنیا کے دیگر لوگ اتنے نادان ہیں کہ وہ بھارت کی اس چال کو نہ سمجھ سکیں۔

نادیہ خان نے ماضی کے واقعات جیسے کہ سمجھوتہ ایکسپریس، ممبئی حملوں اور اب پہلگام واقعے کا ذکر کرتے ہوئے کہا کہ بھارت اس طرح کے حملے اس وقت کرتا ہے جب کوئی اہم مغربی یا امریکی وفد بھارت کا دورہ کر رہا ہوتا ہے۔ انہوں نے کہا کہ پاکستانی قوم ہمیشہ متحد رہتی ہے اور اپنی پاک فوج کی حمایت جاری رکھے گی۔

نادیہ خان کے اس جرات مندانہ بیان کو سوشل میڈیا پر بہت پذیرائی ملی ہے۔ ایک صارف نے لکھا کہ نادیہ خان بالی ووڈ کے لالچ سے آزاد ہیں، اسی لیے وہ سچ بولتی ہیں۔

ایک اور صارف نے کہا کہ نادیہ خان کو سلام پیش کرتا ہوں، کم از کم وہ سچ بولنے کی ہمت رکھتی ہیں۔ ایک مداح نے کہا کہ اسی وجہ سے میں نادیہ خان کو پسند کرتا ہوں، کیونکہ وہ بے باک اور سچی ہیں۔

نادیہ خان کا یہ حب الوطنی سے بھرپور بیان نہ صرف ان کے مداحوں کے دل جیت رہا ہے بلکہ پاکستانی عوام کے جذبات کی بھی عکاسی کر رہا ہے۔