پاکستان نے ابدالی ویپن سسٹم کا کامیاب تجربہ کیا ہے، جس نے 450 کلومیٹر تک ہدف کو نشانہ بنانے کی صلاحیت ثابت کی۔ یہ تجربہ افواج کی تیاری اور میزائل کی جدید خصوصیات کا جائزہ لینے کے لیے کیا گیا۔
پاکستان نے آج ابدالی ویپن سسٹم کا کامیاب تجربہ کیا ہے، جس سے ملک کی دفاعی صلاحیتوں میں مزید بہتری کی نشاندہی ہوتی ہے۔ یہ تجربہ زمین سے زمین تک مار کرنے والے میزائل کا تھا، جو 450 کلومیٹر تک ہدف کو نشانہ بنانے کی صلاحیت رکھتا ہے۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق، یہ تجربہ "انڈس” نامی مشق کا حصہ تھا، جس کا مقصد افواج کی عملی تیاری کو جانچنا اور میزائل کے اہم تکنیکی پہلوؤں کا جائزہ لینا تھا۔ اس میں جدید نیویگیشن سسٹم اور بہتر سمت تبدیل کرنے کی صلاحیت شامل ہیں۔
بیان میں بتایا گیا کہ تربیتی تجربے کا مشاہدہ کمانڈر آرمی اسٹریٹجک فورسز کمانڈ، اسٹریٹجک پلانز ڈویژن اور آرمی اسٹریٹجک فورسز کمانڈ کے سینئر افسران نے کیا۔ اس کے علاوہ پاکستان کے اسٹریٹجک اداروں کے سائنسدانوں اور انجینئروں نے بھی اس تجربے کا مشاہدہ کیا۔
آئی ایس پی آر کے مطابق، صدر مملکت، وزیر اعظم پاکستان، چیئرمین جوائنٹ چیفس آف اسٹاف کمیٹی اور تمام مسلح افواج کے سربراہان نے تجربے میں حصہ لینے والے افسران، سائنسدانوں اور انجینئروں کو مبارکباد دی۔ رہنماؤں نے پاکستان کی اسٹریٹجک فورسز کی تیاری اور تکنیکی مہارت پر مکمل اعتماد کا اظہار کیا اور کہا کہ پاکستان اپنے دفاع کی حفاظت کے لیے ہر طرح کی صلاحیت رکھتا ہے۔
