6 اور 7 مئی کی رات بھارت نے اچانک اور بزدلانہ حملہ کر کے پاکستان کے نہتے شہریوں کو نشانہ بنایا، جس میں پاک فوج کے 11 جوان اور 40 معصوم شہری شہید ہو گئے۔ جواب میں پاکستان کی بہادر افواج نے "معرکۂ حق” کے تحت دشمن کو مؤثر انداز میں نشانہ بنایا اور ثابت کر دیا کہ وطن کا دفاع ہر قیمت پر کیا جائے گا۔
راولپنڈی سے جاری تفصیلات کے مطابق بھارتی مسلح افواج نے 6 اور 7 مئی 2025 کی شب بلااشتعال اور بزدلانہ حملہ کرتے ہوئے پاکستانی علاقوں کو نشانہ بنایا۔ اس حملے میں پاک فوج کے 11 جوان وطن پر قربان ہو گئے جبکہ 40 شہری شہید ہوئے جن میں 7 خواتین اور 15 بچے بھی شامل تھے۔ اس حملے میں 121 افراد زخمی ہوئے جن میں 10 خواتین اور 27 بچے شامل ہیں۔
ترجمان پاک فوج (آئی ایس پی آر) کے مطابق بھارت نے معصوم شہریوں کو نشانہ بنایا، جس پر پاکستانی افواج نے "معرکۂ حق” کے نام سے بھرپور اور مؤثر جوابی کارروائی کی۔ اس جوابی حملے کو "آپریشن بنیان مرصوص” کا حصہ قرار دیا گیا، جس میں دشمن کی پوزیشنز پر انتہائی درستگی کے ساتھ حملے کیے گئے۔
اس دوران وطن کا دفاع کرتے ہوئے پاک افواج کے 11 جانباز جوان شہید ہوئے اور 78 اہلکار زخمی ہوئے۔
شہداء کے نام درج ذیل ہیں:
پاکستان آرمی سے:
- نائیک عبد الرحمٰن
- لانس نائیک دلاؤر خان
- لانس نائیک اکرام اللہ
- نائیک وقار خالد
- سپاہی محمد عدیل اکبر
- سپاہی نثار
پاک فضائیہ سے:
- اسکواڈرن لیڈر عثمان یوسف
- چیف ٹیکنیشن اورنگزیب
- سینیئر ٹیکنیشن نجیب
- کارپورل ٹیکنیشن فاروق
- سینیئر ٹیکنیشن مبشر
آئی ایس پی آر کے مطابق ان شہداء کی قربانیاں جرأت، ایثار اور بے مثال حب الوطنی کی روشن علامت ہیں، جو ہمیشہ قوم کے دلوں میں زندہ رہیں گی۔ پاکستانی مسلح افواج اور پوری قوم ان شہداء کو سلام پیش کرتی ہے اور زخمیوں کی جلد صحتیابی کے لیے دعاگو ہے۔
ترجمان کا کہنا تھا کہ پوری قوم دشمن کی ہر جارحیت کے خلاف متحد اور پرعزم ہے۔ پاکستان کی خودمختاری، سالمیت اور سرحدوں کی حفاظت پر کوئی سمجھوتہ نہیں ہوگا۔ کسی بھی جارحیت کی آئندہ کوشش کا بھرپور، فیصلہ کن اور ہر محاذ پر جواب دیا جائے گا، ان شاء اللہ۔
