ملک بھر میں عیدالاضحیٰ مذہبی عقیدت و احترام کے ساتھ منائی جا رہی ہے اور سنت ابراہیمی کی یاد میں جانوروں کی قربانی کی جارہی ہے۔ لاکھوں مسلمانوں نے صبح سویرے مساجد، عید گاہوں، امام بارگاہوں اور کھلے میدانوں میں نمازِ عید کے بڑے بڑے اجتماعات میں شرکت کی اور قربانی کی عبادت ادا کی۔ علمائے کرام نے خطبات میں حضرت ابراہیمؑ کی قربانی کے فلسفے پر روشنی ڈالتے ہوئے امت مسلمہ کے اتحاد، وطن عزیز کی سلامتی، اور فلسطینی و کشمیری مسلمانوں کے لیے خصوصی دعائیں کیں۔
منہاج ویلفیئر فائونڈیشن
منہاج ویلفیئر فائونڈیشن کے زیر اہتمام بھی سینکڑوں چھوٹے،بڑے جانور اللہ کی راہ میں قربان کئے جارہے ہیں۔قربانی کا گوشت مستحقین تک پہنچانے پہنچایا جارہا ہے ، سینکڑوں رضا کار خدمات انجام دے رہے ہیں۔اندرون اور بیرون ملک مقیم سینکڑوں پاکستانیوں ںے قربانی کا فریضہ منہاج ویلفیئر کے ذریعے ادا کررہے ہیں
شاہ فیصل مسجد میں روح پرور مناظر
دارالحکومت اسلام آباد میں شاہ فیصل مسجد سمیت مختلف مساجد، عید گاہوں اور امام بارگاہوں میں نمازِ عید کے اجتماعات منعقد ہوئے۔ نماز کے اختتام پر افواجِ پاکستان، قومی سلامتی، اور ملک و قوم کی ترقی و خوشحالی کے لیے خصوصی دعائیں مانگی گئیں۔ شہریوں نے قربانی کی رسم ادا کرتے ہوئے گوشت غرباء و مساکین میں تقسیم کیا تاکہ عید کی خوشیاں سب کے ساتھ بانٹی جا سکیں۔
اسے بھی پڑھیں: عید قرباں پر شہریوں کے لئے اچھی اور بری خبر
جامعہ نعیمیہ میں اجتماعی قربانی کا انتظام
لاہور کے دارالعلوم جامعہ نعیمیہ میں چیئرمین نظریاتی کونسل راغب نعیمی کی امامت میں عیدالاضحیٰ کی نماز ادا کی گئی۔ جامعہ میں اجتماعی قربانی کا بڑا انتظام کیا گیا، جہاں پہلے روز 180 جانور قربان کیے گئے، دوسرے دن 100 جانوروں کی قربانی کا اہتمام ہے، اور مجموعی طور پر 300 جانوروں کی قربانی کی جائے گی۔ آئی جی پنجاب ڈاکٹر عثمان انور کے مطابق، صوبے بھر میں سیکیورٹی کے لیے اسپیشل پولیس اور کیو آر ایف ٹیمیں تعینات کی گئیں۔ لاہور میں 5 ہزار سے زائد اجتماعات کی سیکیورٹی کے لیے 6 ہزار سے زائد پولیس اہلکار و افسران کو تعینات کیا گیا۔
سیکیورٹی کے سخت انتظامات
راولپنڈی میں 604 مساجد، 72 امام بارگاہوں اور 62 کھلے مقامات پر نمازِ عید کے اجتماعات منعقد ہوئے۔ ترجمان پولیس کے مطابق، 2700 سے زائد پولیس افسران اور جوان سیکیورٹی کے فرائض انجام دیتے رہے۔ شہریوں نے قربانی کے بعد گوشت ضرورت مندوں میں تقسیم کیا، جبکہ میونسپل اداروں نے صفائی کے لیے خصوصی ٹیمیں تشکیل دیں تاکہ آلائشیں اور کچرا بروقت ٹھکانے لگایا جا سکے۔
چارسدہ روڈ پر مرکزی اجتماع
پشاور میں چارسدہ روڈ پر واقع مرکزی عید گاہ سمیت متعدد چھوٹے بڑے اجتماعات منعقد ہوئے۔ علمائے کرام نے خطبات میں قربانی کے فلسفے اور امت کے اتحاد پر زور دیا۔ شہریوں نے اپنے پیاروں کی قبروں پر فاتحہ خوانی کی اور قربانی کا سلسلہ شروع کیا۔
سبیل والی مسجد میں نمازِ عید
کراچی کے گرومندر پر واقع سبیل والی مسجد میں مولانا منیب کشمیری کی امامت میں نمازِ عید ادا کی گئی۔ خطبات میں عالم اسلام کی سربلندی اور وطن عزیز کی ترقی کے لیے دعائیں کی گئیں۔ شہریوں نے قربانی کے بعد گوشت تقسیم کیا اور عید کی خوشیوں کو بانٹنے کی روایت کو برقرار رکھا۔
ہزار سے زائد اجتماعات
حیدرآباد اور گردونواح میں عیدالاضحیٰ مذہبی جوش و جذبے سے منائی گئی۔ شہر بھر میں ایک ہزار سے زائد چھوٹے بڑے اجتماعات منعقد ہوئے۔ شہریوں نے قبرستانوں میں اپنے پیاروں کی قبروں پر فاتحہ خوانی کی اور قربانی کا سلسلہ شروع کیا۔
سیکیورٹی اور صفائی کے انتظامات
ملک بھر میں نمازِ عید اور قربانی کے موقع پر سیکیورٹی کے سخت انتظامات کیے گئے۔ پولیس، رینجرز اور دیگر قانون نافذ کرنے والے اداروں کو ہائی الرٹ رکھا گیا۔ میونسپل اداروں نے صفائی و ستھرائی کے لیے خصوصی پلان ترتیب دیا، جس کے تحت قربانی کی آلائشیں اور کچرا بروقت ٹھکانے لگانے کے لیے خصوصی ٹیمیں تعینات کی گئیں۔
ہیٹ ویو سے بچاؤ کے لیے احتیاطی تدابیر
محکمہ موسمیات نے خبردار کیا ہے کہ عید کے تینوں دن شدید گرمی اور ہیٹ ویو کا امکان ہے۔ شہریوں سے گزارش ہے کہ وہ گرمی سے بچاؤ کے لیے احتیاطی تدابیر اختیار کریں، جن میں مناسب مقدار میں پانی پینا، دھوپ میں غیر ضروری سفر سے گریز، ہلکے رنگوں کے کپڑے پہننا، اور سر کو ڈھانپ کر رکھنا شامل ہے۔ خاص طور پر قربانی کے دوران کھلے مقامات پر کام کرتے وقت شہری سورج کی تپش سے بچنے کے لیے چھاؤں کا انتظام کریں۔
