وفاقی سرکاری تعلیمی ادارے اب سولر سسٹم پر منتقل ہو چکے ہیں
وفاقی نظامت تعلیمات نے نیشنل ریڈیو اینڈ ٹیلی کمیونیکیشن کارپوریشن کے تعاون سے 100 اسکولوں میں سولرائزیشن کا عمل کامیابی سے مکمل کیا ہے۔ ان تعلیمی اداروں میں سولر سسٹم کے ساتھ ساتھ بجلی کے بیک اپ کے لیے بیٹریز بھی نصب کی گئی ہیں۔
وفاقی سیکرٹری تعلیم محی الدین وانی نے اس منصوبے کو قابل ذکر کامیابی قرار دیتے ہوئے کہا کہ یہ پراجیکٹ پائیدار ترقی اور اختراعی حل کے لیے ہماری محنت اور عزم کو ظاہر کرتا ہے۔ انہوں نے کہا کہ سولر پینلز کی تنصیب تعلیمی اداروں کو قابل بھروسہ اور ماحول دوست توانائی فراہم کرنے کے ساتھ ساتھ کاربن فوٹ پرنٹ میں بھی نمایاں کمی لائے گی۔
محی الدین وانی نے مزید بتایا کہ رواں مالی سال میں یہ منصوبہ مکمل کیا گیا ہے، اور آئندہ مالی سال میں دیگر تعلیمی اداروں کو بھی مرحلہ وار سولر سسٹم پر منتقل کرنے کی منصوبہ بندی کی جا رہی ہے۔
