ملتان:ویسٹ انڈیز نے پاکستان کو دوسرے ٹیسٹ میں شکست دے کر 35 سال بعد پاکستان کی سرزمین پر تاریخی فتح حاصل کر لی۔
پاکستانی ٹیم 254 رنز کے ہدف کے تعاقب میں صرف 133 رنز پر ڈھیر ہوگئی۔ کپتان بابراعظم 31 رنز بنا کر ٹاپ اسکورر رہے۔ اس کے ساتھ ہی دو میچز کی یہ سیریز 1-1 سے برابر ہوگئی۔
ویسٹ انڈیز کے اسپنر جومیل واریکن کو شاندار کارکردگی پر پلیئر آف دی میچ اور پلیئر آف دی سیریز کا ایوارڈ دیا گیا۔ انہوں نے سیریز میں محض 85 رنز دے کر 19 وکٹیں حاصل کیں۔
تیسرا دن
میچ کے تیسرے دن کا آغاز ہوا تو سعود شکیل تیسرے اوور کی گیند پر صرف 13 رنز بنا کر پویلین لوٹ گئے۔ نائٹ واچ مین کاشف علی بھی اگلے اوور میں بولڈ ہو گئے۔
محمد رضوان اور سلمان علی آغا نے ساتویں وکٹ کے لیے 39 رنز جوڑے، لیکن 115 کے مجموعی اسکور پر سلمان علی آغا آؤٹ ہو گئے۔ وکٹ کیپر محمد رضوان بھی 25 رنز سے آگے نہ بڑھ سکے اور بولڈ ہو گئے۔ اس کے بعد نعمان علی 6 اور ساجد خان 7 رنز بنا کر پویلین لوٹ گئے۔
دوسرا دن
دوسرے دن کے اختتام پر سعود شکیل 13 اور کاشف علی ایک رن کے ساتھ کریز پر موجود تھے۔ پاکستان کو میچ جیتنے کے لیے 178 رنز اور ویسٹ انڈیز کو 6 وکٹوں کی ضرورت تھی۔
پاکستان کی دوسری اننگز کا آغاز مایوس کن رہا۔ شان مسعود اور محمد ہریرہ دونوں 2، 2 رنز بنا کر آؤٹ ہوئے، جبکہ بابراعظم نے 31 اور کامران غلام نے 19 رنز اسکور کیے۔
ویسٹ انڈیز نے دوسری اننگز میں 244 رنز بنائے تھے۔ کپتان کریگ براتھویٹ نے 52 رنز کی شاندار اننگز کھیلی، جبکہ دیگر کھلاڑیوں میں میکل لیوس 7، عامر جینگو 30، کیویم ہوج 15، اور گڈاکیش موتی اور جومل واریکن نے 18، 18 رنز بنائے۔
پاکستان کی جانب سے نعمان علی اور ساجد خان نے شاندار بولنگ کرتے ہوئے 4، 4 وکٹیں حاصل کیں، جبکہ کاشف علی اور ابرار احمد نے ایک ایک وکٹ لی۔
پہلا دن
پہلے دن دونوں ٹیموں نے اپنی اپنی پہلی اننگز مکمل کی۔ پاکستان نے پہلی اننگز میں خراب کارکردگی دکھائی۔ شان مسعود 15، کامران غلام 16، محمد ہریرہ 9 اور بابراعظم صرف ایک رن بنا سکے۔ پانچویں وکٹ پر سعود شکیل اور محمد رضوان کے درمیان 68 رنز کی پارٹنرشپ ہوئی، لیکن سعود 32 اور رضوان 49 رنز بنا کر آؤٹ ہو گئے۔
نعمان علی، ابرار احمد اور کاشف علی صفر پر آؤٹ ہوئے، جبکہ سلمان علی آغا نے 9 رنز بنائے۔
ویسٹ انڈیز کی پہلی اننگز 163 رنز پر اختتام پذیر ہوئی۔ پاکستانی اسپنرز نے ایک گھنٹے کے اندر ویسٹ انڈیز کے ابتدائی 7 کھلاڑیوں کو آؤٹ کر دیا۔ کریگ براتھویٹ 9، میکل لیوس 4، اور جسٹن گریوز ایک رن بنا سکے۔
مڈل آرڈر میں کیویم ہوج نے 21 اور کیمار روچ نے 25 رنز بنائے، جبکہ گڈاکیش موتی نے 55 اور جومل واریکن نے 36 رنز کی شاندار اننگز کھیل کر اپنی ٹیم کو سہارا دیا۔
پاکستان کی جانب سے نعمان علی نے ہیٹ ٹرک کرتے ہوئے 6 وکٹیں حاصل کیں، ساجد خان نے 2، جبکہ کاشف علی اور ابرار احمد نے ایک ایک وکٹ لی۔
پاکستانی اسکواڈ
پاکستانی اسکواڈ میں شان مسعود (کپتان)، محمد ہریرہ، بابراعظم، کامران غلام، سعود شکیل، محمد رضوان (وکٹ کیپر)، سلمان علی آغا، ساجد خان، نعمان علی اور ابرار احمد شامل تھے۔
