وفاقی وزیر اطلاعات عطا تارڑ نے کہا ہے کہ ملک سے پنکی، گوگی اور کپتان کی نحوست کا سایہ ختم ہو چکا ہے۔ لاہور میں اپنے حلقے کے لوگوں سے خطاب کرتے ہوئے انہوں نے کہا کہ 190 ملین پاؤنڈ کیس میں ایک ایسے وزیراعظم کو سزا ہوئی ہے جو تحفے میں ملنے والی گھڑیاں بیچ کر کھا گیا تھا۔
عطا تارڑ نے کہا کہ پچھلا وزیراعظم چیزیں بیچتا تھا، جبکہ موجودہ وزیراعظم شفافیت کے ساتھ کام کر رہا ہے۔ انہوں نے کہا کہ ہم نے عوام سے جو وعدے کیے تھے، وہ پورے کر رہے ہیں۔ انہوں نے مزید کہا کہ جو لوگ ملک کو نقصان پہنچاتے ہیں، وہ اپنے کیے کی سزا بھگت رہے ہیں۔
انہوں نے ڈیجیٹل میڈیا پر بے قاعدگیوں کی طرف بھی توجہ دلائی اور کہا کہ اس پر کوئی چیک یا کنٹرول نہیں ہے۔ جس کا دل چاہتا ہے، وہ کسی کے خلاف قتل کا فتویٰ دے دیتا ہے۔
پی ٹی آئی کا ردعمل
پی ٹی آئی کے ترجمان شیخ وقاص نے عطا تارڑ کی باتوں پر ردعمل دیتے ہوئے کہا کہ 190 ملین پاؤنڈ کا کیس کرپشن کا نہیں، بلکہ انصاف کی نیلامی کا مقدمہ ہے۔ انہوں نے کہا کہ اگر حکومت میں شرم ہوتی تو وہ اس کیس کو پروپیگنڈے کا ذریعہ نہ بناتے۔ وقاص نے کہا کہ جب بھی یہ لوگ اقتدار میں آئے، ملک اور عوام کو غربت اور بھوک نے گھیر لیا۔
