دبئی:انٹرنیشنل کرکٹ کونسل (آئی سی سی) چیمپئنز ٹرافی 2025 کے سب سے زیادہ دلچسپ اور بڑے مقابلے پاکستان اور بھارت کے درمیان ہونے والے میچ کے ٹکٹ صرف ایک گھنٹے میں فروخت ہو گئے۔
تفصیلات کے مطابق، 23 فروری کو دبئی میں ہونے والے اس روایتی حریفوں کے ٹاکرے کو دیکھنے کے لیے شائقین بے حد پرجوش ہیں، یہی وجہ ہے کہ جیسے ہی ٹکٹوں کی فروخت شروع ہوئی، مداحوں نے فوری طور پر انہیں خرید لیا۔
ٹکٹوں کی قیمتیں:
چیمپئنز ٹرافی کے اس اہم میچ کے ٹکٹ کم از کم قیمت 500 درہم (تقریباً 38 ہزار پاکستانی روپے) رکھی گئی تھی، جسے شائقین نے ہاتھوں ہاتھ خرید لیا۔
سب سے مہنگا 12,500 درہم (تقریباً 9 لاکھ 50 ہزار پاکستانی روپے) کا ٹکٹ بھی تیزی سے فروخت ہوگیا۔ اس کے علاوہ 1,000، 1,200، 2,500 اور 5,000 درہم کے ٹکٹ بھی شائقین نے بڑی تعداد میں خرید لیے۔
چیمپئنز ٹرافی 2025 کا افتتاحی میچ 19 فروری کو کراچی میں کھیلا جائے گا۔ تاہم، اس سے پہلے 8 فروری سے سہ ملکی سیریز کا آغاز ہوگا۔
بین الاقوامی ٹیموں کی آمد کا شیڈول:
نیوزی لینڈ کی ٹیم 5 فروری کو پاکستان پہنچے گی۔
جنوبی افریقہ کی ٹیم 7 فروری کو پاکستان آئے گی۔
سیریز کا پہلا میچ 8 فروری کو کھیلا جائے گا۔
پاکستان کرکٹ ٹیم کا اعلان کر دیا گیا ہے، جس میں درج ذیل کھلاڑی شامل ہیں:
محمد رضوان (کپتان)
سلمان علی آغا (نائب کپتان)
بابر اعظم، فخر زمان، کامران غلام، سعود شکیل، طیب طاہر
فہیم اشرف، خوشدل شاہ، عثمان خان (وکٹ کیپر)
ابرار احمد، حارث رؤف، محمد حسنین، نسیم شاہ، شاہین شاہ آفریدی
یہ بات قابل ذکر ہے کہ 24 دسمبر 2024 کو انٹرنیشنل کرکٹ کونسل (آئی سی سی) نے پاکستان کی میزبانی میں ہائبرڈ ماڈل کے تحت ہونے والی چیمپئنز ٹرافی 2025 کے شیڈول کا اعلان کیا تھا۔
