کراچی میں ہونے والے سہ ملکی سیریز کے تیسرے میچ میں پاکستان نے 353 رنز کا ہدف حاصل کرتے ہوئے جنوبی افریقا کو سات وکٹوں سے شکست دے کر فائنل میں رسائی حاصل کر لی۔
پاکستان نے 49 اوورز میں چار وکٹوں کے نقصان پر ہدف عبور کیا، جہاں محمد رضوان اور سلمان آغا نے 260 رنز کی ناقابل شکست شراکت داری قائم کر کے ٹیم کی کامیابی میں اہم کردار ادا کیا۔
سلمان آغا 134 رنز بنا کر ٹیم کے نمایاں بلے باز رہے جبکہ کپتان محمد رضوان نے 122 رنز کی شاندار ناقابل شکست اننگز کھیلی۔ طیب طاہر نے 4 رنز بنا کر ناٹ آؤٹ رہنے کا اعزاز حاصل کیا۔ دیگر بلے بازوں میں فخر زمان 41، بابر اعظم 23 اور سعود شکیل 15 رنز بنا کر پویلین لوٹے۔
جنوبی افریقا کے باؤلرز میں وائن ملڈر نے دو جبکہ کوربن بوش نے ایک کھلاڑی کو آؤٹ کیا۔
میچ کے آغاز میں جنوبی افریقا نے ٹاس جیت کر پہلے بیٹنگ کا فیصلہ کیا اور 50 اوورز میں پانچ وکٹوں کے نقصان پر 352 رنز اسکور کیے۔
پروٹیز کی جانب سے ہینرک کلاسن 87، میتھیو بریٹز 83 اور کپتان ٹیمبا بووما 82 رنز بنا کر نمایاں رہے۔ ٹونی ڈی زورزی 22 اور وائن ملڈر 2 رنز بنا کر آؤٹ ہوئے، جبکہ کائل ویرائن 44 اور کوربن بوش 15 رنز کے ساتھ ناٹ آؤٹ رہے۔
پاکستانی باؤلنگ میں شاہین شاہ آفریدی نے دو جبکہ خوشدل شاہ اور نسیم شاہ نے ایک، ایک وکٹ اپنے نام کی۔
