پاکستانی کرکٹر صائم ایوب اور ماڈل کشف علی کی لندن میں وائرل ہونے والی ویڈیو نے سوشل میڈیا پر قیاس آرائیوں کو جنم دے دیا تھا، تاہم کشف علی نے ان خبروں کو بے بنیاد قرار دے کر سخت ردعمل دیا ہے۔
تفصیلات کے مطابق ماڈل، اداکارہ اور سوشل میڈیا انفلوئنسر کشف علی نے انسٹاگرام اسٹوریز پر ردعمل دیتے ہوئے کہا کہ ہمارے ملک میں بے شمار اہم مسائل ہیں، لیکن میڈیا اور عوام غیر ضروری باتوں میں زیادہ دلچسپی لیتے ہیں۔
انہوں نے مزید کہا، "ایک عام سی ویڈیو کو بڑا مسئلہ بنا دیا گیا ہے۔ ویڈیو میں موجود شخص کو آپ نہیں جانتے، جیسے آپ مجھے بھی نہیں جانتے۔ یہ سب میرے لیے مضحکہ خیز ہے، لیکن میں کچھ نہیں کر سکتی، کیونکہ یہی ہمارے ملک کا نظام اور لوگوں کی عادت بن چکی ہے۔”
یہ معاملہ اس وقت شروع ہوا جب صائم ایوب اور کشف علی کی ایک ویڈیو لندن میں وائرل ہوئی۔ ویڈیو میں دونوں کو بولنگ کرتے، باتیں کرتے اور سیلفیاں لیتے ہوئے دیکھا گیا، جس کے بعد مداحوں نے ان کے تعلقات پر قیاس آرائیاں شروع کر دیں۔
22 سالہ صائم ایوب اس وقت لندن میں موجود ہیں، جہاں وہ اپنی انجری سے صحت یابی کے مراحل سے گزر رہے ہیں۔ وہ آئی سی سی چیمپیئنز ٹرافی میں اپنی چوٹ کی وجہ سے شامل نہیں ہو سکے۔
سوشل میڈیا پر یہ افواہیں بھی گردش کر رہی تھیں کہ صائم ایوب اور کشف علی لندن میں ایک ساتھ وقت گزار رہے ہیں۔ کشف علی کی اسنیپ چیٹ اسٹوریز میں اپلوڈ کی گئی ویڈیوز نے ان افواہوں کو مزید بڑھا دیا۔ تاہم، کشف نے وضاحت کی کہ یہ صرف ایک اتفاقی ملاقات تھی، جسے بلاوجہ بڑھا چڑھا کر پیش کیا جا رہا ہے۔
کشف علی نے صارفین کو تنقید کا نشانہ بناتے ہوئے کہا کہ لوگ اہم مسائل پر توجہ دینے کے بجائے غیر ضروری باتوں میں زیادہ دلچسپی لیتے ہیں۔
یہ پہلا موقع نہیں کہ صائم ایوب کسی تنازع کا شکار ہوئے ہوں۔ اس سے قبل بھی وہ خبروں میں آئے تھے، جب انہوں نے لندن میں ایک چیریٹی ایونٹ کے دوران خاتون صحافی سفینہ خان کو نظر انداز کیا تھا۔ اس ویڈیو میں دیکھا گیا کہ سفینہ خان نے ان سے ان کی صحت کے بارے میں پوچھا، لیکن صائم نے مختصر جواب دے کر بات ختم کر دی، جس پر کچھ صارفین نے ان پر تنقید کی، جبکہ کچھ نے ان کے رویے کو ان کے مذہبی پس منظر سے جوڑ کر ان کا دفاع کیا۔
فی الحال صائم ایوب اور کشف علی کے درمیان تعلقات کی کوئی باضابطہ تصدیق نہیں ہوئی۔ تاہم، کشف کا کہنا ہے کہ یہ ایک عام سی ویڈیو تھی، جسے غیر ضروری طور پر اچھالا جا رہا ہے اور اس پر مزید بات کرنے کی کوئی ضرورت نہیں۔
