کرک:پاک فوج نے کرک میں ایک کامیاب آپریشن کے دوران 6 خوارج کو ہلاک کر دیا۔ یہ آپریشن خفیہ اطلاعات کی بنیاد پر کیا گیا، جس میں سیکیورٹی فورسز نے بھرپور کارروائی کرتے ہوئے ملک دشمن عناصر کو جہنم واصل کیا۔
تفصیلات کے مطابق آئی ایس پی آر کے مطابق سکیورٹی فورسز نے 21 فروری کو کرک میں خوارج کی موجودگی کی اطلاع پر آپریشن کیا۔ کارروائی کے دوران پاک فوج کے جوانوں نے بہادری کا مظاہرہ کرتے ہوئے 6 خوارج کو ہلاک کر دیا۔
فوج کے ترجمان کے مطابق، علاقے میں مزید کسی بھی خوارج کے خاتمے کے لیے کلیئرنس آپریشن جاری ہے۔ پاکستان کی سکیورٹی فورسز دہشت گردی کے مکمل خاتمے کے لیے پُرعزم ہیں اور ملک کے تحفظ کے لیے کسی بھی قربانی سے دریغ نہیں کریں گی۔
وزیراعظم شہباز شریف نے دہشت گردوں کے خاتمے پر سیکیورٹی فورسز کو خراج تحسین پیش کیا۔ ان کا کہنا تھا کہ انسانیت کے دشمنوں کے مذموم عزائم کو اسی طرح ناکام بنایا جاتا رہے گا۔ انہوں نے دہشت گردی کے خلاف جنگ میں جانوں کا نذرانہ دینے والے قوم کے بیٹوں کی قربانیوں کو سلام پیش کرتے ہوئے کہا کہ ان کی قربانیاں ہرگز رائیگاں نہیں جائیں گی، اور پاکستان سے دہشت گردی کے مکمل خاتمے کے لیے حکومت اور سیکیورٹی ادارے پوری طرح سرگرم عمل ہیں۔
