کیا آپ کو معلوم ہے کہ ایک ایسا جاندار بھی ہے جس کے جسم میں تین دل دھڑکتے ہیں اور اس کا خون سرخ نہیں بلکہ نیلا ہوتا ہے؟یہ انوکھا اور حیرت انگیز جاندار سمندر کی گہرائیوں میں پایا جاتا ہے۔
تفصیلات کے مطابق آکٹوپس ایک ایسا سمندری جاندار ہے جس کے جسم میں تین دل ہوتے ہیں اور اس کا خون نیلا ہوتا ہے۔ حیاتیاتی نقطہ نظر سے یہ بات نہایت دلچسپ اور حیران کن ہے۔
آکٹوپس کی جسمانی ساخت نہایت پیچیدہ ہوتی ہے، اور یہ خاص طور پر سمندر کی گہرائی جیسے سخت ماحول کے لیے ڈھلا ہوا ہوتا ہے۔ اس کے تین دل مختلف کام انجام دیتے ہیں:
-
مرکزی دل (Systemic Heart): یہ دل پورے جسم میں آکسیجن ملا خون پمپ کرنے کا کام کرتا ہے۔ دلچسپ بات یہ ہے کہ جب آکٹوپس تیرتا ہے تو اس کا یہ دل کچھ وقت کے لیے رک جاتا ہے، اسی لیے آکٹوپس زیادہ تر تیرنے کے بجائے رینگنے کو ترجیح دیتا ہے۔
-
برانکیئل دل (Branchial Hearts): آکٹوپس کے دو دل صرف گلپھڑوں کی طرف خون بھیجتے ہیں تاکہ وہاں سے آکسیجن حاصل کی جا سکے۔ ہر برانکیئل دل ایک گلپھڑے کے ساتھ منسلک ہوتا ہے اور صرف اسی کے لیے کام کرتا ہے۔
دلچسپ حقیقت:
آکٹوپس کا خون نیلا ہوتا ہے، جو کہ عام طور پر انسانوں کے خون کے برعکس ہے۔ اس کی وجہ یہ ہے کہ آکٹوپس کے خون میں "ہیموسائینن” (Hemocyanin) نامی مادہ پایا جاتا ہے جو آکسیجن لے جانے کا کام کرتا ہے، جبکہ انسانوں کے خون میں "ہیموگلوبن” ہوتا ہے جو خون کو سرخ رنگ دیتا ہے۔
یہ انوکھی خصوصیات آکٹوپس کو قدرت کی سب سے خاص مخلوقات میں شامل کرتی ہیں۔
