(شوبز ڈیسک: خصوصی رپورٹ: غلام مرتضیٰ)عالمی شہرت یافتہ کولمبین گلوکارہ Shakira ایک بار پھر فٹبال کے سب سے بڑے ایونٹ FIFA World Cup 2026 سے جڑ گئی ہیں، اور ان کے نئے آفیشل گانے کے ٹیزر نے سوشل میڈیا پر تہلکہ مچا دیا ہے۔
شکیرا نے اپنے سوشل میڈیا اکاؤنٹس پر ورلڈ کپ 2026 کے آفیشل گانے “ڈائے ڈائے” کا ٹیزر جاری کیا، جس میں ان کے ساتھ معروف نائجیرین گلوکار Burna Boy بھی شامل ہیں۔ گانے کی مکمل ریلیز 14 مئی کو متوقع ہے۔
گانے کی ویڈیو برازیل کے مشہور Maracana Stadium میں فلمائی گئی ہے، جہاں رنگا رنگ پرفارمنس اور مختلف قومی ٹیموں کی جرسیوں میں ملبوس ڈانسرز فٹبال کے عالمی جوش و خروش کو نمایاں کرتے دکھائی دیتے ہیں۔
From Maracaná Stadium, here is “Dai Dai,” the @FIFAWorldCup Official Song 2026. Coming 5/14. We’re ready! ⚽️🐺 @burnaboy pic.twitter.com/UcfpO0s7jN
— Shakira (@shakira) May 7, 2026
ٹیزر نے ریلیز ہوتے ہی مداحوں کی توجہ حاصل کر لی اور کروڑوں ویوز سمیٹ لیے، جبکہ سوشل میڈیا پر صارفین نے شکیرا کی واپسی کو “آئیکونک” قرار دیتے ہوئے کہا کہ ورلڈ کپ اور شکیرا ایک دوسرے کے بغیر ادھورے محسوس ہوتے ہیں۔
شکیرا کا فیفا ورلڈ کپ سے تعلق نیا نہیں۔ 2010 کے ورلڈ کپ میں ان کا مشہور گانا Waka Waka (This Time for Africa) عالمی سطح پر زبردست مقبول ہوا اور آج بھی ورلڈ کپ کی تاریخ کے یادگار ترین گانوں میں شمار کیا جاتا ہے۔ اس کے علاوہ 2014 میں “La La La” نے بھی شائقین کو خوب محظوظ کیا تھا۔
نئے ٹیزر میں ماضی کے مختلف فیفا ورلڈ کپ آفیشل فٹبالز کی جھلک بھی شامل کی گئی ہے، جسے مداحوں نے شکیرا کے ورلڈ کپ سے دیرینہ تعلق کا خوبصورت خراجِ تحسین قرار دیا ہے۔
واضح رہے کہ فیفا ورلڈ کپ 2026 امریکا، میکسیکو اور کینیڈا میں مشترکہ طور پر منعقد ہوگا، جبکہ اس بار پہلی مرتبہ سپر باؤل طرز کا ہاف ٹائم شو بھی متعارف کرایا جا رہا ہے، جس کی نگرانی Chris Martin کر رہے ہیں۔
تجزیہ کاروں کے مطابق 2026 کا ورلڈ کپ صرف کھیل نہیں بلکہ موسیقی، تفریح اور عالمی پاپ کلچر کا ایک بڑا جشن ثابت ہوگا، جہاں شکیرا کی واپسی اس ایونٹ کو مزید یادگار بنا سکتی ہے۔
