بھارتی میڈیا رپورٹس کے مطابق یہ فلم جنوبی بھارت کے سپر اسٹار Vijay کی ہے، جس کے ایچ ڈی پرنٹس غیر قانونی طور پر مختلف پلیٹ فارمز پر شیئر کیے جا رہے تھے۔
300 سے زائد لنکس بلاک
سائبر کرائم ونگ نے کارروائی کرتے ہوئے 300 سے زائد پائریسی لنکس بلاک کر دیے ہیں جبکہ مزید غیر قانونی مواد ہٹانے کے لیے بھی اقدامات جاری ہیں۔
حکام کے مطابق فلم کے کلپس اور بعض کیسز میں مکمل فلم 9 اپریل کو انٹرنیٹ پر لیک ہوئی، جس کے بعد فوری تحقیقات شروع کی گئیں۔
تحقیقات کے دوران خصوصی ٹیمیں تشکیل دی گئیں جنہوں نے ڈیجیٹل فرانزک تجزیے کے ذریعے ملزمان کا سراغ لگایا۔
رپورٹ کے مطابق ملزمان نے کلاؤڈ اسٹوریج اور شیئرڈ لنکس کے ذریعے فلم کو بڑے پیمانے پر پھیلایا۔
پولیس نے کارروائی کے دوران اہم ڈیجیٹل شواہد بھی قبضے میں لے لیے ہیں۔
حکام کے مطابق مقدمہ مختلف قوانین کے تحت درج کیا گیا ہے جن میں کاپی رائٹ اور سائبر قوانین شامل ہیں۔
سائبر کرائم حکام نے خبردار کیا ہے کہ غیر قانونی ڈاؤن لوڈنگ یا شیئرنگ میں ملوث افراد کے خلاف سخت کارروائی کی جائے گی۔
فلم کے پروڈیوسرز نے عوام سے اپیل کی ہے کہ غیر قانونی لنکس کو فوری حذف کریں تاکہ فلم کو مالی نقصان سے بچایا جا سکے۔
دوسری جانب اداکار وجے کی جانب سے اس معاملے پر تاحال کوئی باضابطہ ردعمل سامنے نہیں آیا۔
فلموں کا ریلیز سے قبل لیک ہونا نہ صرف فلم انڈسٹری کے لیے بڑا معاشی دھچکا ہوتا ہے بلکہ یہ تخلیقی محنت کی بھی کھلی خلاف ورزی ہے۔
ڈیجیٹل دور میں پائریسی ایک بڑا چیلنج بن چکی ہے، جہاں جدید ٹیکنالوجی کے باوجود مواد کو محفوظ رکھنا مشکل ہوتا جا رہا ہے۔
اگر اس کے خلاف سخت اقدامات نہ کیے گئے تو فلمی صنعت کو اربوں روپے کا نقصان ہو سکتا ہے، جبکہ فنکاروں اور پروڈیوسرز کی حوصلہ شکنی بھی بڑھ سکتی ہے۔
