آئی سی سی چیمپئنز ٹرافی، رواں ہفتے شیڈول کا اعلان متوقع

نئی دہلی: اگلے سال فروری میں پاکستان میں ہونے والی چیمپئنز ٹرافی میں اب صرف 3 ماہ رہ گئے ہیں تاہم انٹرنیشنل کرکٹ کونسل کی جانب سے اب تک ٹورنامنٹ کا شیڈول جاری نہیں کیا گیا جس کی وجہ سے براڈ کاسٹرز اور کمرشل پارٹنرز میں بے چینی بڑھ گئی ہے۔
چیمپئنز ٹرافی پر پاکستان اور بھارت کے درمیان تنازع تاحال جاری ہے، بھارت پاکستان آکر ٹورنامنٹ کھیلنے سے انکار کر چکا ہے جبکہ دوسری جانب پاکستان کسی بھی ہائبرڈ ماڈل قبول نہ کرنے کے اپنے مؤقف پر قائم ہے۔
انڈیا ٹوڈے کی ایک رپورٹ کے مطابق اس معاملے پر بیک چینل پر بات چیت جاری ہے اور آئی سی سی پی سی بی کو ہائبرڈ ماڈل کو قبول کرنے کے لیے راضی کرنے کی پوری کوشش کر رہا ہے۔
رپورٹ میں کہا گیا کہ چیمپئنز ٹرافی کے شیڈول کا اعلان اس ہفتے کے آخر تک متوقع ہے۔انڈیا ٹوڈے نے ذرائع کے حوالہ دیتے ہوئے بتایا کہ ابھی بھی چیمپئنز ٹرافی کے شیڈول پر پاکستان اور دیگر اراکین کے ساتھ بات چیت جاری ہے، ایونٹ کا شیڈول ممکنہ طور پر ایک دو دن میں سامنے آجائے گا۔
واضح رہے کہ پاکستان کرکٹ بورڈ کے چیئرمین محسن نقوی نیکہہ چکے ہیں کہ چیمپئنز ٹرافی پاکستان میں ہی ہوگی اور اگر بھارت کو تحفظات ہیں تو ہم سے بات کرے، پاکستان کی عزت سب سے پہلے، باقی باتیں بعد میں ہیں۔
انہوں نے کہا کہ چیمپئنز ٹرافی پاکستان میں ہی کرائیں گے، ہمارا رابطہ صرف آئی سی سی سے ہے، ان کے جواب کا انتظار ہے جب کہ بھارت کو تحفظات ہیں تو ہم سے بات کرے ،ہم بھارت کے تحفظات دور کریں گے۔