کپل شرما کے شو میں کام کرنا میری زندگی کی سب سے بڑی غلطی تھی، نسیم وکی

کپل شرما کے شو میں کام کرنا میری زندگی کی سب سے بڑی غلطی تھی، نسیم وکی
پاکستان کے مشہور کامیڈین اور تھیٹر اداکار نسیم وکی نے کہا کہ بھارتی کامیڈی شو "کامیڈی نائٹس ود کپل” میں کام کرنا ان کی زندگی کی سب سے بڑی غلطی تھی۔ انہوں نے یہ بات حال ہی میں احمد علی بٹ کی پوڈکاسٹ میں کی، جہاں انہوں نے بھارتی انڈسٹری میں اپنے تجربات اور پاکستانی فنکاروں کے رویوں پر کھل کر بات کی۔

نسیم وکی نے کہا کہ سرحد پار کام کرنے کے بعد انہیں پاکستان میں پذیرائی یا محبت کے بجائے زیادہ تر تنقید کا سامنا کرنا پڑا۔ ان کا کہنا تھا کہ پاکستانی انڈسٹری کے بعض فنکاروں نے ان کے اس فیصلے پر سرہانے کے بجائے سخت تنقید کی۔

انہوں نے مزید کہا کہ "مجھے اس بات پر شرمندگی ہے کہ میں نے کامیڈی نائٹس ود کپل میں کام کیا۔ اس شو میں شرکت سے نہ تو مجھے پاکستان میں کوئی خاص فائدہ ہوا اور نہ ہی بین الاقوامی سطح پر۔ اس کے بجائے مجھے یہ سنا کہ میں نے وہاں جا کر کیا حاصل کیا؟”

نسیم وکی نے پاکستانی کامیڈی انڈسٹری کی کمیوں پر بھی بات کی۔ ان کا کہنا تھا کہ یہاں تھیٹر اور کامیڈی میں اسکرپٹ کے بغیر کام کیا جاتا ہے جس کے نتیجے میں نیا ٹیلنٹ سامنے نہیں آ رہا۔

انہوں نے مزید کہا، "گزشتہ 10 برسوں میں کامیڈی کے میدان میں کوئی نیا چہرہ سامنے نہیں آیا کیونکہ ریہرسل اور تیاری کو اہمیت نہیں دی جاتی۔”