اسلام آباد: وزیراعظم کے مشیر رانا ثنااللہ نے کہا ہے کہ پی ٹی آئی جس جانب دیکھ رہی ہے، وہ کسی سیاسی ایجنڈے پر بات نہیں کریں گے۔
نجی ٹی وی کے پروگرام میں گفتگو کرتے ہوئے رانا ثنااللہ کا کہنا تھا کہ پی ٹی آئی کو کسی قسم کی کوئی ونڈو نہیں ملی ہے، اور جس طرف وہ دیکھ رہے ہیں، وہاں کسی سیاسی ایجنڈے پر بات چیت نہیں ہو رہی۔
انہوں نے مزید کہا کہ اگر پی ٹی آئی والوں کو کوئی غلط فہمی ہوئی ہے تو وہ جلد دور ہو جائے گی۔ انہیں پارلیمنٹ میں آنا بھی ہے اور اپنی مراعات بھی حاصل کرنی ہیں۔
رانا ثنااللہ کا یہ بھی کہنا تھا کہ خیبرپختونخوا میں پی ٹی آئی نے حکومت تو کرنی ہے، لیکن وہ کام نہیں کرتے۔ یہ لوگ لوگوں کو اکٹھا کرتے ہیں اور کیپیٹل پر حملہ کرنے کی کوشش کرتے ہیں، لیکن اس بار ایسا کرنے کی اجازت نہیں دی جائے گی۔
واضح رہے کہ پی ٹی آئی کے بانی عمران خان نے حکومت کے ساتھ مذاکرات ختم کرنے کا اعلان کیا ہے۔
